Una de les imáxenes más prestoses que tengo de David Rivas ye nel Muséu del Pueblu d’Asturies, nun Día de la Reciella, apocayá. Yera una xornada na que les families de neñes y neños que cuiden la tresmisión interxeneracional del idioma y la cultura asturiana armen una folixa con un procuru (est)éticu inmeyorable. A David recuérdolu sentáu, énte’l tendeyón, col llombu sofitáu nel tueru d’un arbolón, a la solombra, colos güeyos zarraos, echando un pigazu con media sorrisa na cara. Yera la más pura imaxe de la felicidá, de la tranquilidá, del tar n’harmonía cola redolada, con tol significáu y puxu comunicativu del llugar. Nesi intre, víense munchos elementos qu’axuntaben dafechu lo que representaba David Rivas: l’amor a un país, Asturies, que, como dixeron los revolucionarios irlandeses, habría ser llibre “dende la tierra a les estrelles”. Y cola Lluna, les estrelles y Xúpiter, despedíase nun post nel so Facebook, ensin ser consciente d’ello, a la manera que nengún guion de película diba ser quién a imaxinar.
Falar de David Rivas ye falar d’una xeneración qu’abrió camín n’Asturies nos últimos años del franquismu y que defendió una idea de democracia asturiana dende una óptica rexeneradora, nueva, poniendo la cultura popular al serviciu de la recuperación de l’autoestima coleutiva del nuesu pueblu y, con ello, ser quién a ameyorar les vides de toes y toos. Por eso, nun ye raro qu’a lo llargo’l domingu y ayer, llunes, nel actu multitudinariu de despidida de Rivas, la sensación de tar ente xente d’un mesmu sentir yera tan fuerte.
Esti día dexónos ún de los nuestros. Nun facía falta tener militao nel mesmu partíu, nin compartir toles posiciones ideolóxiques, siquiera ser del mesmu equipu de fútbol, pa tar nel mesmu llau que Rivas. Pémeque nun compartí munchos espacios organizativos con él, seique en munchos momentos tuvi en dellos, precisamente, alternativos anque tan cercanos que cásique s’abrazaben…al empar que se separtaben. Sicasí, güei decátome de la importancia d’esi sentir coleutivu, poderosu, ente quien llevamos Asturies dientro, como cantaba Nuberu, y tenemos a les asturianes y asturianos por compatriotes. Esti día, nel so actu civil de despedida, había un daqué nel ambiente; dalgo construyío, texío, dende hai yá más de mediu sieglu, pola xeneración política que Rivas emburrió xunto a munches de les persones presentes.
Nun facía falta tener militao nel mesmu partíu, nin compartir toles posiciones ideolóxiques, siquiera ser del mesmu equipu de fútbol, pa tar nel mesmu llau que Rivas
Ellí taba la so familia política, pero tamién la de sangre. Yo nun conocía a les sos fíes, más que poles referencies qu’elli mesmu ponía nes redes que compartía con nós, un auténticu escaparate a los sos esmolecimientos y reflexones. Esti día tan murniu, falando per primer vegada con elles y tresmitiéndo-yos el ciñu pol compromisu sociopolíticu de David, decatéme de qu’esisten munches como Olaya y Aida n’Asturies. Munchos Ástores, munchos Llorianes o Lluises, una bayura de Xurdes, de Xanes, d’Enoles, de Lenes, de Deves, de Xabelos, de Xuanes, de Xulianes, de Llucíes… Entendéisme, de xuru, porque la recuperación de lo propio tamién garró forma de nome propiu. La xeneración de muyeres y homes qu’hai yá cincuenta años dieron un ximielgón a la política asturiana, con organizaciones como Conceyu Bable o’l Conceyu d’Asturies de Madrid, dexaron un patrimoniu políticu ya institucional impagable. Pero, tamién, fueron grana d’una fornada de neños y neñes, fíos/es d’un tiempu y unes persones que trabayaron xuntes, que vivieron la ilusión de la primer escolarización del asturianu y les grandes manifestaciones pol idioma y la cultura, del xorrecer de la música tradicional y/o d’esa referencia internacional de lo celta, de les bandes de gaites, de los garrapiellos de baille, de la lliteratura propia, de les primeres producciones televisives y radiofóniques. Homes y muyeres de la dómina política de David Rivas foron responsables d’una tresmisión xeneracional del idioma de manera militante, consciente, curiada, non namás ambiental: una educación abierta que diseñó conteníos modernos que nun esistíen n’asturianu, prestosos, entornos amables y estimulantes onde nun los había, pa pasanos el testigu de la querencia por tolo que somos como pueblu. Fixéronlo too dende un país verde, pequeñu, arrequexáu ente montes y mar, apostando por afuxir de l’asimilación política y cultural, amosando la importancia de siguir siendo, ensin dase a la fuerza de la corriente que diba nel otru sentíu.
El camín qu’esta xente abrió nun pue quedar pa prau. La sienda que desaveró aquella xeneración apurriónos una Asturies muncho meyor que la que pudo lleganos ensin el so compromisu perenne col país. Préstame muncho que l’alcordanza más significativa que me va quedar de Rivas seya, casualmente, nun actu de families esmolecíes pola tresmisión xeneracional del idioma. Aquella reciella, que güei cría a xeneraciones nueves col vuestru exemplu, ha garrar el testigu pa siguir avanzando social, política y culturalmente.
Gracies, David. Por ser. Vamos siguir suañando los vuestros suaños d’una Asturies meyor.
