“El gobiernu asturianu, compuestu por PSOE y Convocatoria por Asturies (IU-Más País-IAS) acaba d’aprobar unos presupuestos pal añu 2025 que, siendo los más abultaos de la historia del país, nun son abondo pa los retos económicos, sociales y políticos que precisa enfrentar esta tierra. Puen atopase coses a aplaudir, como l’ampliación d’una rede d’escuelines que yera bien necesaria y que la población vamos agradecer, pero nun representen una alternativa creyible en política económica: por exemplu, les sos respuestes al problema de la vivienda son mui insuficientes y mantienen el sofitu a la educación concertada y la sanidá privada, siguen abandonándose los texíos productivos primariu y secundariu ensin intervención pública y piérdense toles oportunidaes pa dar a la cultura’l valir d’industria que podría tener. Son unos presupuestos que podría firmar la canciller Ángela Merkel n’Alemaña o’l PSOE n’Asturies ensin nengún gobiernu de coalición. Suénennos, porque yá los conocemos d’otres vegaes” señalen dende Aína.
“¿Pero y la izquierda a la izquierda del PSOE, esiste na Xunta Xeneral y el Gobiernu d’Asturies? Suponse que ye IU y que ta nel gobiernu pa llindiar a la FSA, pero nun ye nada nuevo que nun se vea; ésta nun ye la primer vez qu’acompañen al PSOE nel gobiernu d’Asturies pa facer les polítiques del pexe gordu y non les del pequeñu. Manca especialmente una reforma del impuestu de sucesiones que’l PSOE-y cuela a la coalición, a cambiu de nada. Recordemos que’l coordinador d’IU esprecetábase hai pocos meses, cuando’l so partíu frenaba la reforma d’un estatutu nuevu que necesita con urxencia Asturies apellando a unes “llínies coloraes” que teníen que ver con esti impuestu, qu’Aína ta d’alcuerdu en caltener, y que, cuando IU ta nel gobiernu “asume” por “sentíu d’estáu”. ¿Ye esti, el d’estáu, un sentíu que namás se tien pa caltenese nuna macroconseyería y non cuando toca, por exemplu, da-y dignidá a una llucha histórica de 50 años pola oficialidá de la llingua asturiana?” apunten dende el partíu asturianista.
“Énte la falta de coherencia y silencios d’IU, l’espaciu políticu de Covadonga Tomé cai na vieya trampa del PSOE; nuna pinza ensin salida bona: o yo -los presupuestos del gobiernu asturianu- o’l caos, diz l’executivu. Y voten los presupuestos como si los negociaren o fueren xestionar unes polítiques de duldosa capacidá tresformadora, pero ensin facelo. ¿Nun podemos esperar más de quien, nun tando en gobiernu, aspira a dar voz a los sectores subalternos? ¿Anticipa esti votu favoratible movimientos políticos futuros? Esmoleznos la sensación de nun ver lluz na Xunta Xeneral y ye por ello qu’hai dos años Aína dio’l pasu, énte la orfandá política, pa constituyise como ferramienta de cambiu” afirmen los asturianistes.
“Pa tener una verdadera oposición d’izquierdes al centrismu del PSOE habrá qu’esperar, entós, a les votaciones del 2027 y qu’Aína entre a les instituciones pa da-y un verdaderu emburrión a la educación, la sanidá, el tresporte, la vivienda y la enerxía publiques” concluye el comunicáu.
