Cola biblioteca del edificio históricu de la Universidá d’Uviéu enllena hasta’l tope, nuna “xornada ensin precedentes” pa Xosé Antón González Riaño, inauguróse’l Congresu Mundial de la Cultura Asturiana. El son de la gaita de Xuacu Amieva dio iniciu a un actu “de fonda allegría” pal presidente de l’Academia de la Llingua Asturiana, nel que les másimes autoridáes del país dieron abellugu a la iniciativa ñacida de la revista Cultures, espublizada pola ALLA dende 1991.
El Congresu, que “quiso llamase mundial” p’amosar que “la interpretación d’Asturies nun puede quedase llindada al nuesu propiu país”, y que tien que tener tamién una “mirada internacional, una visión de la cultura nuesa amplia y trasversal”, tien el sofitu del Gobiernu y del Rectoráu, un finxu que llega, tal y como dixo Adrián Barbón, “nun momentu clave, nun cruce de cultures como seguramente na historia de la humanidá nun se conoció otru”.
El presidente del Principáu d’Asturies punxo sobre la mesa la globalización y les migraciones “que nos train novedaes interesantes”, como les que van amosase mientres los tres díes vinientes nel Congresu, colos “meyores especialistes de la materia, llegaos de tolos requexos del mundu”, debatiendo sobre la identidá asturiana, la cultura y los procesos identitarios.
Sicasí, quisieron los intervinientes na inauguración del Congresu Mundial de la Cultura Asturiana adelantase a l’actualidá y dar l’anuncia de delles sorpreses polítiques y académiques. Ignacio Villaverde, rector de la Universidá d’Uviéu, que fizo’l so discursu n’asturianu, como’l restu de personalidáes, y tamién en gallego asturiano, aprovechó la ocasión p’anunciar el ñacimientu d’un premiu añal nos estudios d’Antropoloxía Social y Cultural, que va llevar el nome de Purificación Viyao Valdés (1892-1934), pionera de l’antropoloxía científica n’Asturies dende un puntu de vista progresista y feminista.
Les mesmes blimes van llevar, bien llueu, a la materialización definitiva de la cátedra María Xosefa Canellada, dedicada a los estudios asturianistes, y que por temes alministrativos lleva parada dellos años. Solo falta, agora, el movimientu a nivel ministerial pa introducir na Universidá d’Uviéu, qu’el rector definió tamién como “universidá d’Asturies, porque Asturies nun sedría a entendese ensin esta institución”, l’asturianu y los estudios al so rodiu.
Pola so parte, Barbón anunció la puesta en marcha del “procedimientu pa declarar bien d’interés cultural les dances tradicionales” y aseguró que “tres décades de desarrollu cultural y educativu, ye’l momentu de dar el siguiente pasu: reconocer la oficialidá”, “el futuru que merecemos y defendemos dende’l gobiernu d’unidá progresista y reformista”. Sentáu entre les primeres files de la sala, les reserváes a les autoridáes polítiques, atendía a les pallabres del presidente, sollerte, Álvaro Queipo, presidente del Partíu Popular d’Asturies.
El Congresu Mundial, qu’entamó cola conferencia “Retos de la antropología”, de Paz Moreno Feliú (UNED), va continuar hasta el vienres.
