Esti xueves foi atopáu ensin vida, na so casa, el cuerpu de Damián Barreiro. Militante de la Xunta pola Defensa de la Llingua Asturiana, y mui activu en redes sociales, onde xestionaba la canal de Youtube Horros & Frixuelos, onde analizaba les conexones ente la cultura asturiana y la cultura pop contemporánea. Desconócense entá les causes de la muerte del escritor avilesín, que podríen tar rellacionaes con recién problemes de salú física.
Llicenciáu en periodismu pola Universidá del País Vascu, trabayó nes redacciones d’Asturies.com y Les Noticies y, anguaño, facíalo na delegación asturiana de l’axencia Europa Press.
Críticu y analista de televisión, en 2014 asoleyó “Caleya Sésamu: el papel de la televisión na tresmisión interxeneracional de la llingua” y en 2018 “Asturploitation”. Ganador trés vegaes del Premiu ‘Máximo Fuertes Acevedo’ d’ensayu n’asturianu, ‘Asturianía kitsch: decálogu de la cultura pop astur’ foi’l so llibru últimu.
