Con un sentíu homenáx al economista David Rivas, fallecíu el pasáu mes d’avientu, púnxose’l ramu a les primeres sesiones de la mañana del Congresu Mundial de la Cultura. Nel Aula Severo Ochoa, ún de les dos onde ta desendolcándose estos díes la cita al rodiu de la revista Cultures -les sesiones, paraleles, celébrense tamién na estancia contigua, l’Aula Magna-, decenes de persones ficieron remembranza del profesor, asturianista ya intelectual de Xixón. Una tierra onde la intelixencia parez avivase polos “aires cantábricos que lleguen al Musel”, en pallabres de Ramón Tamames que recordó Gemma Durán, profesora d’Economía na Universidá Autónoma de Madrid, onde fora alumna de Rivas.
Durán destacó la trayectoria profesional de Rivas, llicenciáu en 1980, el mesmu añu nel qu’entamó a poner clás d’estructura económica, lleendo la so tesis, “Aproximación a la economía ecológica y ambiental. Planteamientos teóricos, instrumentos y políticas”, a finales de la década de los 80 y consiguiendo la plaza de titular en 1991. “La so manera de poner clás taba mui lloñe de lo veceru”, valoró la economista, quien recordó la cercanía de Rivas, la so fina ironía y el “papel fundamental na formación de investigadores nuevos d’un economista que, dende la so atalaya madrilana, averó a los sos alumnos a la naturaleza y al mundiu rural, enseñándo-yos que “los recursos naturales nun yeren solo factores productivos, como se suel creyer n’Economía”.
De la diferencia entre valir y preciu charrara, na ponencia anterior, Xosé Alba, tamién discípulu de Rivas, que-y dirixió, na Universidá Autónoma, la so tesis doctoral, “Potencialidad de los espacios naturales protegidos como impulsores del desarrollo socioeconómico de su área de influencia el caso del Parque Natural de Somiedo (Asturias)”, poniéndose asina en solfa ún de los pegoyos del pensamiento de Rivas, quien razonaba que les investigaciones al rodiu d’Asturies teníen que ser mayoritaries na propia tierra y defendía una visión atlántica de la economía.
El sentir críticu de Rivas, que trató tamién de profesar a los sos alumnos –“falaba siempres de qu’un profesor yera aquel que profesa, como si esta actividá tuviera dalgo de sagráu o de sacerdotal”, recordaba Durán-, llevaríalu a ser pioneru na valoración de la cultura sidrera n’Asturies, anguaño padremoñu de la Humanidá. Una declaración que llegó el cuatro d’avientu de 2024, precisamente el día del 67 cumpleaños de Rivas, edá cola que moriría once díes dempués. “El meyor regalu d’esti cumpleaños acaba llegame de Paraguai”, dixera entós l’economista nes sos redes sociales. Güei la comunidá científica recuerda y agradez el llegáu d’un home qu’un día, nuna charra cola so fía Aida, defendió que “hai que dexar bien llantaes les idegues y los conocimientos que-yos puedan valir a les xeneraciones futures pa facer pie”. De pallabra, y tamién, y lo más importante, d’obra.
