Si hay llingua materna… ¿Hay música materna? Esta ye una entruga perbona dempués d’aquelles 37 recomendaciones sobro’l multillingüismu que fizo la UNESCO, en payares de 1990, y que valieron p’afitar el 21 de febreru como «Día de la llingua materna».
De la música y la llingua asturiana, como se tien visto nel primer artículu d’esta serie, naide nun fue quien a francer el filu de la so tresmisión mientres sieglos. La música materna, mesmo que la llingua materna, ye dalgo que nunca nun taraza constitución sinodal nin llei de nenguna triba. La xente nunca nun dexa de cantar al estilu «del país». «Nun cantamos pa ser felices. Somos felices porque cantamos», diría cualisquier asturianu d’esa dómina. Cómo sería la cosa qu’hasta la ilesia termina por almitir el cantu popular asturianu, tan prestixosu ente los fieles –y antepasáu de l’asturianada– n’aquella Misa de Angelis recién afitada nel sieglu XVI…
La xente nunca nun dexa de cantar al estilu «del país»
D’esta miente apórtase pal sieglu decimononu, que ye cuando na educación musical n’Asturies aprucen nuevos centros d’enseñanza al marxe del colexu de San José y el catecismu de neños de la ciudá d’Uviéu (fundaos nel 1665 y 1869). N’Asturies entá retumbaben na uvieína Puerta de La Limosna los ecos de gaites y tambores tres declara-y la guerra a Napoleón (el 25 mayu 1808) cuando Javier de Burgos afala l’ordenamientu territorial español de 1833. Esti modelu, basáu nel sistema departamental francés, provoca una reaición cultural que nel casu asturianu cuaya en manifestaciones artístiques de pintores como Evaristo Valle, Ventura Álvarez Sala o Juan Martínez Abades y lliteratos como Fermín Canella Secades, Constantino Cabal Rubiera, José García Peláez ‘Pin de Pría’ o Emilio Robles Muñiz ‘Pachín de Melás’.
Toos estos creadores (y munchos otros) componen obres con llingua y temática asturiana. Dedíquense a tola «cultura materna» pa nun vela somorguiada nel cafiante océanu centraliegu que, güei igual qu’ayeri, simboliza Madrid. Tola Península sorraya la propia cultura como fonte artística y vital nun conseñamientu xeneral naquella Europa decimonónica, la mesma que puxa pol espíritu del pueblu o volkgeist: si’l llinguaxe ye la espresión del alma, entós la llingua d’un pueblu (Volk) espresa les carauterístiques del so espíritu (Geist).
Puralmente ye dende entós p’acá cuando se fala del cantar tradicional gallegu, asturianu, vascu, etc. Y ello nun ye falar de fenómenos puramente musicales nin lliterarios. Pela cueta, trátase de constructos identitarios que xurden nel sieglu XIX nun contestu de pensamientu románticu y dientro d’un movimientu nacionalista que xustifica los primeros «estándares asturianos» escritos col envís científicu. Los mesmos qu’atopamos naquellos pioneros diccionarios y partitures. Los mesmos que sintió’l viaxeru inglés Hans Gadow n’Asturies de 1897:
«Tol mundu, homes, muyeres y neños, mientres trabayen nos campos canten unes poques notes en repetición interminable. La cosa entama de xeitu prometedor; les pallabres son cencielles y la postrera de cada versu enllarga con voz trémbole, tantu como da de sí l’aliendu. Tou ello pue paecer llamativu y prestoso, siempres qu’haya un intérprete con bona voz, pero la mayoría d’esta xente nun tien el más llixeru sentíu musical. (…) N’ocasiones improvisen con non poca habilidá; entós la perllarga sílaba final de cada versu vien de camín, y da-y tiempu al poeta pa pensar les prósimes pallabres»
Na sociedá asturiana ye la burguesía l’estamentu que sofita la constitución de sociedaes filarmóniques y nel 1883 fúndase la primer academia civil de música tres casi cuatro sieglos de monopoliu na Santa Ilesia Catedral d’Uviéu. El reglamentu d’esta nueva «Escuela Provincial y Elemental de Música» róblenlu Víctor Sáenz, Anselmo González del Valle y l’etnógrafu, bibliófilu y escritor Fermín Canella Secades. Esto fai que la situación de la música fecha n’Asturies careza un vuelcu impresionante y qu’al marxe de la oralidá como mediu de tresmisión, les fuentes escrites algamen gran importancia.
La influencia de figures como Víctor Sáenz, Rufino González Nuevo, Teodoro Cuesta o José Hurtado (ente otros), va ser determinante na vida y nel aportar de dellos cantantes de música popular, participantes directos na tresmisión d’aquel vieyu repertoriu qu’hasta entós permanecía na tradición oral del pueblu asturianu. Escríbese la música tradicional nel pentagrama, y surden por orde d’apaición: Tres Pout-pourris de cantos asturianos (Uviéu, 1865, 1870 y 1875) de Víctor Sáenz; Todo por Asturias, primeru y segundu caprichos Pout-pourrísticos sobro cantares populares d’Asturies, de Rufino González—Nuevo Miranda (Uviéu, 1885 y 1887) y los Cien cantos populares asturianos de José Hurtado (Madrid, 1890).
A nivel nacional tamién tien de citase’l trabayu Cantos populares de España, de José Inzenga (Madrid, 1873) con 7 temes de cuñu asturianu ente los que destaquen 1 danza prima, 1 soberana y 1 madalena. Col cambéu de centuria van ver la lluz nuevos trabayos como Alma asturiana de Fidel Maya y Francisco R. Lavandera (Xixón, 1908); Seis Rapsodias asturianas y les 10 y 20 Melodías asturianas d’Anselmo Glez. del Valle (Uviéu, 1906 y 1914) y tien que falase n’abondo de Baldomero Fernández Casielles, Eduardo Martínez Torner, Manuel del Fresno y tolos cambeos tecnolóxicos del sieglu XX… Pero eso va ser otra historia.
Entós, si hai llingua materna… ¿Hay música materna? Yá vemos que pasó nel sieglu XIX. Anguaño, cuido que tolos músicos asturianos conocemos y participamos d’una estraterritorialidá artística mientres facemos los nuestros estudios. Escartafoyando partitures de Vivaldi, Mozart, Beethoven o Prokofiev usamos semántiques perdíes abenayá. ¿Cuántes d’eses melodíes son nuestres daveres? Nel corazón, toes. Na tradición, nenguna. Detrás d’esto esmúcese l’esqueletu del folclor. D’unes músiques arrequexaes pola soberbia y la inorancia de los currículos académicos. Una cadarma triste y espelleyada de melodíes, lletres y bailles onde namás unos pocos vamos afatando con voluntá y cariñu un repertoriu, una llingua y, per ende, una memoria y una identidá pa ser dalgo nesti mundu globalizáu.
Casi tol mundu pasa pel aru de les polítiques patrimoniales qu’encamienta la UNESCO. A la fin, la reconocencia y la igualdá de los seres humanos ye un oxetivu vieyu al que nos averamos más y más valtando pilancos como’l racismu, el machismu, la homofobia, l’elitismu y el clasismu. Poro, tenemos que ser nós, los asturianos, quienes puxemos pola música y la llingua materna col precuru y rixu que fai falta.
