L’asociación cultural El Llavaderu entama unes xornaes sobre medioambiente, que tienen como títulu xenéricu “Al verde” y que van tratar temes diversos, con trescendencia social, dalgunos d’ellos mui presentes en titulares informativos de los últimos meses. Esi ye’l casu de la primer mesa redonda, que va desarrollase esti xueves día 13 de marzu nel salón d’actos del institutu El Río Ñora, y que va versar sobre los parques de bateríes.
Como ponentes van tar na mesa Marga Vallina García, representante de la Coordinadora Ecoloxista; Carlos Mañes, voceru de la Plataforma Stop Bateríes d’Asturies; y como moderadora Silvia Tárano, integrante de l’asociación y conceyala en Siero.
Les siguientes charres van celebrase los segundos xueves de cada mes nel Llavaderu y los asuntos a tratar van ser: n’abril, la minería, concretamente les esplotaciones plantegaes en Peñamayor y La Collá.
En mayu, la soberanía alimentaria y l’agricultura rexenerativa; en xunu, el tratamientu de los residuos; y en xunetu, la crisis ecosocial. Tolos actos van ser nel local de l’asociación, na cai Martín de Llugones 9 de La Pola Siero, n’horariu de 19:30 a 21:00.
