El pasáu mes de febreru morría inesperadamente n’Avilés Damián Barreiro. Llicenciáu en periodismu pola Universidá del País Vascu, trabayó nes redacciones d’Asturies.com y Les Noticies y, anguaño, facíalo na delegación asturiana de l’axencia Europa Press.
Críticu y analista de televisión, en 2014 asoleyó “Caleya Sésamu: el papel de la televisión na tresmisión interxeneracional de la llingua” y en 2018 “Asturploitation”. Ganador trés vegaes del Premiu ‘Máximo Fuertes Acevedo’ d’ensayu n’asturianu, ‘Asturianía kitsch: decálogu de la cultura pop astur’ foi’l so llibru últimu.
Na so obra trató siempres de pensar les posibilidaes de los medios de comunicación para espandir l’usu del asturianu.
Esti vienres artistes, periodistes, políticos, amigos y compañeros de la Xunta pola Defensa de la Llingua Asturiana rindieron homenaxe n’Avilés a Damián y el so universu de pop y asturianía.
Semeyes: Tania González
