Acabante de terminar nel Ayuntamientu de Balmonte la proyeición del documental sobre Xosé Álvarez, Pin, al qu’esti añu ta dedicada la Selmana de les Lletres, cayéronme delles llagrimuques qu’intenté reprimir de baldre. Y paecióme que taben tamién a puntu de salir de los güeyos de Noé Fernández, otru collaciu del Conceyu d’Asturies que montó Pin en Madrid fai mediu sieglu, cuando vieno a despidise con voz entrecortada. Fredo Huergo Pandiella, que taba al llau, púnxo-y pallabres a aquella señaldá compartida, que tampoco disimulaba la conseyera de Cultura, Vanessa Gutiérrez, como la mayoría de los que tábemos ellí, incluida la familia de Pin: «Emocióneme, coño. Debe ser la vieyera».
Averéme entós al corru nel que taben Vanessa, el direutor xeneral de Política Llingüística, Antón García, y l’alcalde, Gilberto Alonso, al que y-dixi que’l meyor y más natural homenaxe a Pin sería que l’Ayuntamientu del so conceyu usara la llingua asturiana, como facía esi vecín exemplar, pioneru del Surdimientu, gran escritor y célebre activista. Facía un pedacín que se inaugurara una placa n’alcordanza de Pin, escrita en castellanu, la llingua na que faló l’alcalde nel primer actu institucional de la Selmana de les Lletres, onde tolos demás lu ficieron n’asturianu. L’alcalde pareció dame la razón, pero alegó que nun sabía falar n’asturianu. Sorprendíu, entrugué-y entós d’ónde yera. Contestóme que d’un pueblu de Balmonte. «Pero ahí se habla normal», añadió.
Nun tien mayor importancia esta anécdota nin quiero criticar nin demonizar a Gilberto Alonso; l’home, pamidea, simplemente quería desplicar que nel so pueblu fálase “amestao”, meciendo castellanu con asturianu, como ye vezu n’Asturies. Quiero pensar que l’alcalde socialista de Balmonte, que ye bien mozu, diría perdiendo la llingua de los sos pas y güelos casi ensin decatase, como munchos vecinos y como gran parte de los asturianos. Y non por falta de ciñu, sinón por galbana. Nun camiento que Gilberto Alonso piense que falar castellanu ye “lo normal” y facelo n’asturianu ye falar mal, ente otres coses porque l’alcalde nun ye lo que se diz un virtuosu falante de la llingua de Cervantes nin ta dotáu pal arte de la oratoria, polo que pudimos escuchar nel homenaxe a Pin.
Si m’interesa la anécdota ye porque me paez paradigmática de la situación llingüística d’Asturies: la falta d’apreciu de munchos asturianos pola so cultura o la pervivencia de prexuicios y complexos al considerar inda al asturianu una llingua menor delantre de la castellana. Too ello en contraste col trabayu y la militancia d’otra parte activa de la sociedá asturiana, que caltién el puxu pola sobrevivencia del idioma propiu qu’entamaron mozos como Pin a finales de los años 70 del sieglu pasáu.
La cabera vez que falé con Pin, na primavera del 2001, cuando él naguaba por refundar el Conceyu d’Asturies en Madrid pa convertilu nuna especie de lobby asturianista na capital española, notélu gachu sobre’l futuru de la llingua y esperanzáu sobre’l del país. «Ay, Xuanín, la llingua ta perdida, lo qu’hai que salvar ye’l país», comentóme.
Citámonos pa discutir nel branu sobre ello. Tamién sobre lo divino y lo humano, porque les conversaciones y los alderiques con Pin daben siempre pa muncho. Nun me estrañaba’l pesimismu sobre la llingua, una situación qu’a mi tamién m’esmolez abondo. Pin vía, y sobre too oyía, el retrocesu na fala del so conceyu cada vez que venía en vacaciones. Esto vien de mui atrás, yá lo dicía’l Padre Galo en 1928, nel so poema Rigu Esva: «Duelme’l ver que la tierrina / se fai cada vez más mala / ya de las mías mocedades / nun y-queda güei nin la fala».
Pero yo pensaba argumenta-y un par de coses a Pin, facer por poner lluz na escuridá: per un requexu tamién puede vese, no que se refier a la llingua, que ye un muertu que goza de buena salú. Lleven más d’un sieglu dándola por muerta y ehí sigue. En 1927 Leopoldo Alas Argüelles, el rector Alas, dicía que la desapaición de lo qu’entós denomaben bable yera «natural e inevitable». Nun tuvi oportunidá de volver a falar con Pin, y de pasu devolve-y tol material que me pasara pa un artículu que publiqué pol 25 aniversiariu del Conceyu d’Asturies en Madrid, porque’l de Cigüedres dexónos al entamu d’esi branu traicioneru.
Pa empezar pensaba conta-y que, anque cuantitativamente la llingua va p’atrás al empar que lo fai la vida rural, onde tán la mayoría de los sos falantes “patrimoniales”, cualitativamente espoxigó con nuevos falantes más mozos, urbanos en buena parte. Ye xente que yá conoció l’asturianu na escuela, anque siga siendo una asignatura “maría”. Na lliteratura, onde algamó un altor sobresaliente, y na música, onde la llingua ta normalizada cuantayá, los ésitos son evidentes.
Anque nun soi nacionaliegu como yera Pin, creo qu’ensin llingua nun hai país
Tamién diba dici-y que, anque nun soi nacionaliegu como yera Pin, creo qu’ensin llingua nun hai país y qu’una Asturies castellanizada dafechu sería tamién un pueblu históricu desaniciáu, como l’idioma de los asturianos.
Ye verdá qu’una llingua ensin oficialidá nel sieglu XXI, cuando na Península Ibérica mesmamente tán en retrocesu y en peligru las que tienen esi estatus (el catalán, l’euskera, el gallegu y l’aranés), paez condenada a desapaecer. Amás de por otras cuestiones, la cooficialidá pal asturianu ye imprescindible como ferramienta pa combatir esa galbana de los que lu quieren pero nun lu falen y pa da-y prestixu cola xente, qu’asina la vería “normal”, como’l castellanu.
Sicasí, siendo realistes, la cooficialidá —que taría xustificada anque quedara un únicu falante pa que nun morriera una llingua románica, como me dixo un día Emilio Marcos Vallaure— nun la vamos ver en munchu tiempu, si ye que la vemos. Perdíose la gran oportunidá na llexislatura anterior na Xunta Xeneral, pola negativa del únicu diputáu de Foro Asturias y pol desdexamientu del gobiernu Barbón, que nun se enfotó nello.
¿Cómo se salva una llingua ensin cooficialidá? Polo menos intentándolo dende’l gobiernu autonómicu, que nun acaba de pasar de les muses al teatru. Inda nun pasamos del bla, bla, bla, bable d’escaparate políticu, y de la política del pites, pites, cuatro subvencionines, probes y ruines en comparanza col castellanu o col inglés, con munchu más sofitu públicu, que nun sirven nin pa desendolcar una industria cultural propia.
Enantes d’algamar la cooficialidá hai unos pasos imprescindibles que’l gobiernu asturianu nun acaba de dar. Son tres pegoyos p’afitar la normalización llingüística que l’asturianismu cultural bien demandando dende cuantayá: la educación, la toponimia y la RTPA.
Nun son oxetivos imposibles o descomanaos, pero pal gobiernu asturianu paécenlo porque les batalles perdíes son les que nun se llibren. La especialidá pa los maestros d’asturianu ye fundamental pa la dignificación del idioma na escuela y nun ye d’entender que nun se llogre con gobiernos socialistes n’Asturies y n’España. La toponimia ye, en muchos casos, una política fallida que da argumentos a los enemigos de la llingua, que tienen grandes voceros na derecha y na extrema derecha na Xunta Xeneral. Na RTPA sigue ensin haber una programación de calidá n’asturianu, y non solo nos informativos, cuando hai dende fai tiempu abondos profesionales competentes pa desendolcala.
Al frente de la Conseyería de Cultura ta una gran escritora n’asturianu, persona sensible cola llingua y que tien les idees clares sobre’l camín a siguir. Y lo mesmo podría dicise de l’antecesora de Vanessa Gutiérrez, que foi Berta Piñán. Pero’l carru institucional que tien que tirar por una política llingüística afayadiza nun acaba nunca de ponese en marcha, nun debe ser del país. Nesa Conseyería hai unos tarrecimientos y unos vezos, llantaos no alministrativo y no burocrático más qu’en polítiques actives y valientes, que da que pensar sobre la conveniencia de que la cultura tenga ministros o conseyeros que s’ocupen d’ella. Un alderique mui vieyu pero siempre actual.
Afortunadamente n’España’l castellanu goza de mui buena salú, ye una llingua qu’avanza per tol mundu y que nun tien problemes col restu de llingües peninsulares. La torga que tien son los anglicismos y l’acosu del gobiernu de Donald Trump, pero eso nun paez que-yos esmoleza nin que-yos cafie a los ultres y supremacistes llingüísticos del castellanu.
N’Asturies la diglosia, l’usu polos falantes de dos llingues, fai qu’avance cada día más el castellanu, qu’arrasa. Que l’asturianu llegara hasta equí, ensin oficialidá, arrequexáu na Alministración, na enseñanza y nos medios de comunicación, en tiempos d’utilitarismu onde compite tamién con otros idiomes como l’inglés, ye un pequeñu milagru. Y lo mesmo puede dicise de la llingua propia que se fala ente l’Eo y el Navia, que ta más viva y en meyor situación, pol aislamientu históricu que padeció esa fastera.
Va siendo hora de que los asturianos nos tomemos en serio’l nuesu patrimoniu inmaterial, el llingüísticu, que ye tan importante o más que’l material. Nun ye que y-faigamos munchu casu al arte asturiano o prerrománico, pero polo menos nun tamos dispuestos a dexar qu’esbarrumben los palacios y les ilesies de la Monarquía asturiana, que ye lo que tamos faciendo coles llingües d’Asturies.
Pin foi un home de mundu que salió a los tres años d’Asturies, primero hacia Buenos Aires y dempués a Madrid, y nunca dexó de falar y escribir perbién y de forma natural na llingua de los suyos. Préstame pensar que, casi un cuartu de sieglu dempués, podría siguir retrucándo-y pa refugar el so pesimismu.
Tranquilu, Pin, n’Asturies tovía nun fala normal tol mundu, anque tán nello. Equí siguimos los tuyos, encerriscaos en nun ser los últimos falantes d’una llingua milenaria.
