“Un Tiempu Meyor” ye’l nome del II Congresu Nacional d’Aína. Dempués de dos años y mediu de camín, esta formación asturianista d’izquierda llama a tola afiliación a participar esti sábadu 24, a les 16h, na Casa la Cultura de La Felguera (Llangréu), nuna xornada na que va haber una serie de ponencies y dinámiques de trabayu collaborativu. Nella van afitase tamién les llinies d’acción a siguir con vistes a les elecciones de 2027.
Hasta les 20h va desendolcase esti Congresu que va entamar evaluando los puntos fuertes y febles d’estos primeros años de camín, a la par que faciendo propuestes de meyora. Darréu van aldericase los distintos documentos políticos -Análisis político-económicu del país y l’alternativa; Informe de la Mesa Nacional; De les eleiciones de 2027; Ponencia organizativa- y les sos respectives enmiendes.
Tres d’una posa, la parte última del Congresu “Un Tiempu Meyor” va centrase nel horizonte de les elecciones de 2027 y en cómo trabayar nestos dos años hasta qu’aporten les elecciones conceyiles y autonómiques. “Nesti sen, va trabayase tamién con unes una propuestes nueves d’Executiva y de modelu de Mesa Nacional” informen dende Aína.
Por un tiempu meyor
Con esti Congresu, el partíu asturianista d’izquierda “nagua por dar un pasu fondu na consolidación como fuercia política cola capacidá de presentar una alternativa real y tresformadora”. “La xornada va sirvir pa fortalecese internamente, fomentar la participación y siguir trabayando por “un tiempu meyor” pal país” señalen dende Aína.
