Nun mundu cada vez más globalizáu y uniforme, marcáu pola crisis climática y ecolóxica y con una mayor concentración de poder económicu, conceptos como soberanía, sostenibilidá y sociedá son más necesarios que nunca. Tres palabres que representen idees venceyaes ente sí, pieces d’un engranaxe que determina cómo vivimos, producimos, cuidamos l’entornu y nos rellacionamos socialmente. Actuar dende esos tres exes faise cada vez más necesario pa países pequeños como Asturies; nesti sen, la izquierda alternativa y tresformadora d’esta tierra debería facelos suyos y desarrollar la so acción en base a ellos.
Decidir dende lo cercano
Tradicionalmente, la soberanía entendíase como la capacidá d’un territoriu pa gobernase a sí mesmu. Sicasí, ensin arrenunciar a ello, güei esti términu amplíase a otros ámbitos: l’alimentación, la enerxía o la cultura. Falar de soberanía ye falar de poder decidir dende lo local lo que comemos, cómo y qué producimos o los valores que queremos tresmitir. En territorios como Asturies, la soberanía pasa por reforzar el mundu rural, protexer la producción propia y garantizar que les decisiones sobre los recursos naturales nun se tomen dende llugares alloñaos. Falar de soberanía ye tamién recuperar el poder de decisión sobre los nuestros recursos: el campu, la mar, los montes, la industria y les formes de vida que los sostienen. Significa apostar pola producción local, por un desarrollu industrial equilibráu y éticu y pola cultura como motor d’identidá. Dende un puntu de vista social, la soberanía tamién implica fortalecer les comunidaes, fomentar la cooperación y evitar la dependencia d’intereses esternos que nun tienen en cuenta la realidá del territoriu. Otra manera, nel planu de les organizaciones polítiques necesitamos qu’estes exerzan la so actividá y tomen les sos decisiones dende Asturies y p’Asturies.
Vivir ensin acabar colos recursos
La sostenibilidá implica atopar un equilibriu ente’l progresu y el cuidáu del territoriu. Ye pensar a llargu plazu, non namás nesti momentu. En términos prácticos, significa apostar por una economía circular, pola transición enerxética y pola conservación de la biodiversidá. Pero tamién tien una dimensión social: una sociedá sostenible ye aquella que garantiza condiciones de vida dignes ensin agotar lo común. N’Asturies, esti conceptu adquier especial relevancia pola so riqueza natural y la so historia industrial. Sicasí, la sostenibilidá nun afecta namás al mediu ambiente, tamién inclúi la xusticia social, la equidá y la diversidá cultural. Una sociedá sostenible nun puede basase nel consumu desmidíu nin na precariedá llaboral, sinón nel equilibriu ente bienestar, naturaleza y responsabilidá colectiva. Les plantaciones d’ocalitos o la industria de la guerra, por exemplu, nun deberíen ser opciones de futuru si naguamos por una Asturies sostenible.
La fuercia del colectivu
Nun hai soberanía nin sostenibilidá ensin sociedá. Les persones y les comunidaes son el motor del cambiu. La sociedá ye l’espaciu onde se concreten los valores, onde la teoría fáise realidá y la propia ciudadanía da forma a los procesos. La participación ciudadana, el cooperativismu y la educación son ferramientes claves pa facer una sociedá más consciente y solidaria. Les redes de vecindaes, los colectivos locales o los movimientos pola tierra y la cultura son exemplos de cómo la sociedá puede ser motor del cambiu. N’Asturies ye imprescindible articular y dar puxu a la sociedá civil, involucrala na toma de decisiones, volver a convertila nun factor determinante del cambiu que precisamos. Per otru llau, esti apueste polo colectivo, lleva implícito una defensa radical de los servicios públicos, non solo defender lo qu’hai, sinón amplialos y ameyoralos.
Tres S
Combinar soberanía, sostenibilidá y sociedá ye apostar por un modelu onde lo local y lo global dialoguen, onde la tradición y la innovación s’alcuentren. En definitiva, ye entender que la calidá de vida nun depende solo del consumu, sinón del sentíu de pertenencia, del respetu pol mediu y de la capacidá de decidir xuntos y xuntes el futuru que queremos. Estes Tres S habríen de ser el núcleu central de l’acción de la izquierda alternativa nel nuestru país, un espaciu anguaño esperdigáu ente disitintes organizaciones, colectivos y persones. Necesitamos abrir el debate y los distintos actores —plurales o individuales— asumir responsabilidaes y tomar decisiones. Estos tres exes, equí namás esbozaos, bien podrían marcar una fueya de ruta. Buscar puntos d’alcuentru comunes y una base sobre la que trabayar conxuntamente ye la opción más adecuada y conveniente nesti momentu crucial, nel que la solombra del autoritarismu y la intolerancia anubre’l futuru, tamién el d’Asturies.
