Afirmar que la mariña asturiana ye la meyor caltenida nel conxuntu del Estáu ye yá un llugar común. Pero nun ta demás repitilo otra vegada, teniendo en cuenta la estraordinaria relevancia ambiental, paisaxística y, tamién económica, que tuvieron les polítiques protectores desplegaes polos Gobiernos asturianos dende l’entamu de l’autonomía.
Agora que se cumplen venti años de l’aprobación del Plan Especial de Protección de la Mariña asturiana (POLA), asomen dellos relatos que quieren asitiar nesti preséu normativu’l principal finxu del blindaxe protector del espaciu costeru y, de camín, patrimonializar unu de los grandes ésitos políticos, sinón el que más, de la nuesa hestoria contemporánea.
Pero la protección llegal de la mariña asturiana entama y culmina muncho más atrás de l’aprobación del POLA nel 2005. Convién recordar esi percorríu pa poner a los responsable nel so sitiu y facer un repartu equitativu de los méritos.
Nes seminales Normes Urbanístiques Rexonales nel Mediu Rural del añu 1983, yá s’establecía la categoría del suelu non urbanizable de costes, qu’incluyía los terrenes próximos a la llínea costera que, por tar sometíos a una fuerte demanda pa la implantacion d’actividaes diverses, fundamentalmente de segunda residencia o turístiques, debíen de protexese de manera específica, y que comprendía una franxa de protección d’anchor non menor de 100 metros al Sur de les carreteres que lu acutaben. Nesa franxa quedaba prohibido cualquier tipu de construcción fora de los Núcleos Rurales incluyíos nesti suelu, a nun ser aquelles rellacionaes directamente cola actividá agropecuaria.
Les Directrices Rexonales d’Ordenación del Territoriu aprobaes nel añu 1991 falen, per primer vegada, d’establecer como zona sensible, una banda a lo llargo de la mariña de 500 metros d’anchor, coincidente cola que la Llei de Costes de 1988 denominaba de “zona d’influencia”, inda como un criteriu ordenador de cara al futuru y non como norma directamente vinculante. En paralelu, l’últimu gobiernu de Pedro de Silva yá taba iguando´l preséu xurídicu afayadizu qu’impunxo preceptivamente en tola franxa mariniega’l suelu non urbanizable de costes con un anchor obligatoriu de 500 metros: por alcuerdu del Conseyu de Gobiernu de 21 de febreru de 1991 ordenábase empecipiar la elaboración y tramitación de les Directrices Subrexionales d’Ordenación del Territoriu pa la Franxa Costera, que s’aprobaríen definitivamente n’avientu del añu 1993, yá con Trevín na presidencia del Principáu.
Nestes Directrices Subrexionales disponse que va ser de directa aplicación en virtú del so conteníu de calter supraordenador, y ensin que sía necesaria la so incorporaci6n material a un preséu concretu de planiamientu, la delimitación del suelu non urbanizable de costes con un anchor de 500 metros y un réxime bien restrictivu d’usos, siendo los únicos permitíos los agrícoles y forestales que nun portaren edificación.
Coles Directrices Subrexionales d’Ordenación del Territoriu pa la Franxa Costera de 1993, empobinaes pol últimu gobiernu de Pedro de Silva, la mariña asturiana adquier el más restrictivu réxime de protección del que gociara nunca. Con posterioridá, la Llei del Suelu del 2002 y el testu refundíu (TROTU) del 2004, actualmente vixente, reproducen esa regulación, magar qu´abren dos peligrosos furacos: la posibilidá de que’l futuru Plan d’Ordenación de la mariña amenorgara l’anchor de 500 metros en determinaos tramos de mariña y la rehabilitación d’edificios pal so usu turísticu.
Esi plan, el POLA, del qu’agora se cumplen venti años, ye un escelente documentu descriptivu y propositivu, anque dende’l puntu de vista puramente normativu la so técnica xurídica sía manifiestamente ameyorable.
Depués nel 2016 llegó un segundu plan, el PESC, con un valiosísimu trabayu de campu y un gran aparatu instrumental, pero con una arquitectura xurídica, en munches ocasiones, confusa. Pero eso yá ye farina d’otru costal.
