La Conseyería d’Educación aumentó un 34,2 por cientu la matriculación n’asturianu y eonaviegu nesti cursu escolar, algamando los 30.782 estudiantes, fundamentalmente pola introducción de la llingua autóctona nel segundu ciclu d’Infantil como escoyeta voluntaria.
L’averamientu a la llingua asturiana, a traviés d’dalgunos de los conteníos incluyíos nel área d’aprendizaxe Comunicación y representación de la realidá, implantóse de mou simultaneu nos trés niveles del segundu ciclu d’Infantil.
Nesti primer añu matriculáronse 7.652 neños y neñes: 6.220 en centros públicos y 1.432 en centros concertaos, lo que supón el 48 % del total del alumnáu d’esta etapa educativa, informa la Conseyería d’Educación.
Descontáu l’alumnáu d’Infantil, los estudiantes de Llingua Asturiana y Lliteratura en Primaria, Secundaria y Bachilleratu aumentaron un 0,83 % respeuto al cursu anterior.
El principal crecimientu de matrícula n’asturianu y eonaviegu producióse ente l’alumnáu de Secundaria de la rede concertada, con un 36,5 % más que nel cursu 2024-2025, siguíu de Bachilleratu en centros públicos (8,7 %) y Primaria na enseñanza concertada (4,2 %). Pela contra, en Primaria y Secundaria de la rede pública producióse un descensu del 1 % y del 0,2 %, respeutivamente.
No tocante al entamu de les clases d’asturianu na Escuela Oficial d’Idiomes d’Uviéu, matriculáronse 43 persones nos trés niveles disponibles.
