La Sociedá Cultural Xixonesa propón que l’espaciu de nueva creación de Naval Azul lleve’l nome d’Ígor Mediu Tuya, conocíu artísticamente como El Natahoyo, coincidiendo col vigésimu aniversariu del so fallecimientu. La iniciativa busca reconocer la figura d’esti referente de la cultura asturiana nel barriu onde nació y al que siempres tuvo fondamente venceyáu.
Dende la entidá promotora deféndese que la designación d’esti espaciu supondría una reconocencia afayadiza y respetuosa, ensin causar molesties nin inconvenientes al vecindariu, yá que na zona de Naval Azul esisten espacios de nueva creación que güei en día inda nun tán habitaos.
Ígor Mediu Tuya nació n’El Natahoyo (Xixón) en xineru de 1972, nun contestu familiar y social marcáu pol compromisu democráticu y vecinal de los sos padres, Luis Mediu y Sonia Tuya. Dende bien neñu mamó’l sentimientu de pertenencia al barriu y la idea del compromisu social, valores que marcaríen tola so trayeutoria vital y creativa.
Músicu y dibuxante dende mui mozu, foi miembru fundador del grupu de música tradicional asturiana Felpeyu en 1991, col que llogró una importante proyección nacional ya internacional. Amás, desenvolvió una intensa actividá como dibuxante, colaborando en numberosos periódicos y revistes de cómic. La so vida truncóse tráxicamente’l 24 de xunu de 2006 nun accidente de tráficu camín d’una actuación en Barcelona, nel que tamién perdió la vida Carlos Redondo, compañeru en Felpeyu.
La figura d’Ígor Mediu siguió siendo referencia dempués del so fallecimientu. Foi protagonista de la Selmana de les Lletres Asturianes de 2022 y la so obra y compromisu cola llingua y la cultura popular quedaron recoyíos na publicación Ígor Medio: Carbón y arena. Amás, la so madre, Sonia Tuya, cedió en 2025 l’arquivu gráficu del artista al Muséu del Pueblu d’Asturies, garantizando l’accesu llibre a investigadores y la conservación d’esti patrimoniu cultural. A ello súmase la celebración bienal del Ciclu Folk de Cámara Ígor Medio nel Muséu Casa Natal de Xovellanos.
Por tolo anterior, la Sociedá Cultural Xixonesa considera que “hai razones sobraes” pa dedicar un espaciu públicu a Ígor Mediu Tuya nel so barriu natal d’El Natahoyo, como reconocencia a una vida dedicada a la música, al dibuxu y a la cultura asturiana, y como homenaxe permanente a la so fonda hestoria personal y colectiva con Xixón y Asturies
