La propuesta de candidatura unitaria de la izquierda alternativa asturiana fecha por Somos Asturies ta animando esi espaciu políticu y produciendo reacciones a la mesma. De mano, la cautela y la prudencia son la norma común como respuesta, lo que ye positivo y demuestra cierta voluntá d’encarar el tema. N’Asturies, les variables a tener en cuenta seríen dos, per un llau la propia unidá de la izquierda tresformadora y, per otru, l’articulación d’un suxetu políticu plural de calter soberanu con plena capacidá d’acción y decisión.
Globalmente vivimos somorguiaos nun ambiente onde les fuercies reaccionaries, cuando non directamente neofascistes, tán algamando niveles de poder y influencia como nunca dende la Segunda Guerra Mundial. Una fola qu’acabó llegando al Estáu español y amenaza tamién a Asturies. Frente a ello nun cabe la inorancia o’l desdexu, ye la hora de l’autoorganización, l’agrupación de fuercies y la unidá de los/es demócrates y progresistes.
Nel casu concretu del nuestru país, les consecuencies d’una hipotética llegada al poder de la derecha y la ultraderecha podríen ser catastrófiques. Un Gobiernu del PP condicionáu por Vox puede suponer l’esmantelamientu de tolo consiguío nestos cincuenta años de construcción d’un discursu asturianu (autonomía, cultura, llingua…); produciéndose un retrocesu bultable y abriendo’l pasu al cuestionamientu de la propia existencia política d’Asturies. Nun ye difícil d’imaxinar qué polítiques identitaries diben desenvolver dende un gobiernu autonómicu con conseyeros de PP-Vox, namás hai que ver lo que ta asocediendo anguaño en comunidaes como Aragón, País Valencianu o Baleares. Nel aspectu social, les clases populares y trabayadores asturianes sufriríen directamente la mengua o perda de polítiques sociales, la privatización de servicios públicos y el retrocesu de derechos. Simplemente hai qu’asistir a dalgún de los debates na Xunta Xeneral pa saber qué nos espera si’l tándem de la derecha se fai col Gobiernu Asturianu: baxada d’impuestos a los ricos, entrada a sacu del sector priváu na sanidá, frenu al autogobiernu, neolliberalismu xabaz, menospreciu a les minoríes, estrozu medioambiental… porque eso ye lo que manifiesten nos sos discursos los sos voceros nel nuestru parllamentu. Un futurible posible que nun hai que relativizar o suavizar, la postura del «nun será pa tanto» ye nesti momentu mui peligrosa y irresponsable, más cuando la esperiencia nos diz que’l ciclu nun van ser namás cuatro años, sinón que s’abriría un periodu llargu de predominiu de les dereches.
L’asturianismu modernu nun foi quien en cincuenta años d’existencia a articular una organización estable con respuesta social a nivel electoral y capacidá d’influencia real na política del país. Ye una xera que tenemos pendiente y na qu’hai que siguir aporfiando, esi ye l’oxetivu de toes y toos aquellos que nos adscribimos a esa corriente de pensamientu políticu. Na situación actual, toca adaptase a la realidá y, ensin desdexar la consecución d’una fuercia política propia influyente y hasta decisiva, frenar l’avance de quien niega’l propiu ser d’Asturies. Pa ello, nun queda otro qu’acumular fuercies, asumiendo les nuestres diferencies, cuestionando les polítiques desenvueltes dende l’alministración autonómica hasta’l momentu, almitiendo otres estratexes, pensando nel futuru… Agora ye’l momentu de la responsabilidá y la xenerosidá.
La propuesta de Somos Asturies, ensin querer capitalizala, apela a la sensatez y el compromisu con esta tierra y el momentu históricu nel que nos alcontramos. Ye una llamada a la esperanza y la ilusión, a —como se diría n’asturianu— nun danos, nun rindinos. Hemos ser quien ente toles fuercies de la izquierda alternativa asturiana a ellaborar un programa de mínimos p’articular un frente ampliu que dea respuesta a esos miles d’asturianos y asturianes que tán esperando una respuesta conxunta a la situación d’incertidume que nos amenaza. Sentémonos y falemos.
