El sindicatu SUATEA sumóse al manifiestu impulsáu por Europa Laica xunto a un centenar de personalidaes y colectivos sociales que reclamen la derogación de los alcuerdos ente l’Estáu español y la Santa Sede, al consideralos incompatibles con un Estáu aconfesional y democráticu.
La iniciativa cuenta col sofitu de organizaciones como Fundación Ferrer i Guardia, Derecho a Morir Dignamente, Plataforma Recuperando, Redes Cristianas, Asociación Internacional de Libre Pensamiento y Red Laicista Europea, ente otros colectivos venceyaos al llaicismu y la defensa de la neutralidá relixosa del Estáu.
El manifiestu tamién recueye’l sofitu de figures del ámbitu cultural, académicu y social como Javier Sádaba, Nieves Concostrina, Benito Zambrano, Leo Bassi, Juan José Tamayo o Lidia Falcón.
Nel testu, los promotores llamenten que “nun s’abriera la puerta a reformes fondes” y denuncien que los alcuerdos de 1976 y 1979 caltienen “privilexos pal catolicismu” que, a la so xera, “erosionen la llibertá de conciencia de la ciudadanía”.
Europa Laica considera que dichos alcuerdos son una prolongación del Concordatu franquista de 1953 y denuncia que perpetúen una relación institucional contraria al principiu de separación ente Ilesia y Estáu.
La organización anunció amás l’entamu d’una campaña de recoyida de firmes empobinada a llograr un ampliu sofitu social a esta reivindicación. La primer entrega de firmes ta prevista nel Congreso de los Diputados coincidiendo cola anunciada intervención del León XIV énte congresistes y senadores.
Según Europa Laica, dicha presencia institucional del pontífiz na sede de la soberanía nacional supón una “deriva confesional” impropia d’un Estáu aconfesional.
El SUATEA y el restu d’entidaes adheríes fixeron finalmente un llamamientu a la ciudadanía pa sofitar un modelu d’Estáu llaicu basáu na igualdá, la neutralidá institucional y el respetu a la diversidá de convencimientos.
