Una vez, nel entamu de los 80, coincidí con Kiko el de Cudillero, que ye como lu llamaba tol mundu, na sala de fiestes que llevaben los del Grana, un chigre y restaurante mui célebre de Curdiana. Va tiempu que nos conocíemos. Kiko yera de Novellana y yo de San Esteban, y ya nos corriéramos más d´una farra.
Tando ellí enterámonos de que na fiesta acababa de ser la elección de una Miss, parezque que Miss Asturias, y nun atopaben al presentador de la entrega del premiu, que diba ser nun sé que periodista que nun aparecía pola sala. Creo que Emilio Tamargo. Nerviosos, los organizadores pusiéronse a buscar como llocos a otro periodista pa sustituilu. Con munchu cachondeo nel cuerpu, Kiko nun lo pensó dos veces. Pidíome el carné de prensa que yo llevaba nun bolsu de la chupa y, con esi aval y munchu morru, acabó presentando aquel espectáculo cómico con un ésitu del que dieron fe los aplausos de la xente y las risas de los amigos del improvisao presentador, que asistíamos a aquella comedia dende la barra.
Así yera Kiko. Simpáticu, graciosu, con una chispa natural que y-sirvió pa triunfar nel mundu de la política cuando dio esi pasu. Antes tuvo munches y variopintes ocupaciones, protagonizando histories tan costumbristes como aquella ente les Misses. De vixilante nel Colexu San Luis de Pravia, onde estudiamos los dos, y hasta n´una funeraria, xera de la que contaba mil histories de humor negru. Verdaderamente, la de Kiko podría recordar a la vida desaxerada de Martín Romaña, el personaxe de la novela de Bryce Echenique. Tinía el carácter activu, llaboriosu y emprendedor de los vaqueiros del conceyu de Cuideiru que yeren sus vecinos; y lu mantuvo hasta el final, cuando montó un peculiar mirador en Novellana pa que los turistas vieran dende ellí la playa del Gaveiru, qu´ellos llamen del Silencio.
Les primeres aventures de Kiko na política fueron, d´estudiante en Uviéu, cola ultraderecha. Nunca lu negó, anque tampoco taba precisamente orgullosu, y lu tenía por pecao de mocedá. Dempués de ganar la batalla interna nel PSOE de Cuideiru, se trabayó l´alcaldía pasu ente pasu na zona rural del conceyu, rural y ganadera, mui distinta no social y político a la capital pescadora. Sus primeros ocho años na alcaldía fueron perbuenos, tinía puxu, enerxía ya idees, anque fueron los de la reconversión de Cuideiru, de la pesca al turismu, un tránsitu con munches aristes. Fue la época dorada del municipalismu de la FSA. Kiko taba colos villistas, pero fizo un gran dúo nel Occidente con Jesús Landeira, que yera de los nomaos entós renovadores.
El resto del mandatu na alcaldía sobro-y dafechu. Téngolo-y dicho munches veces y nun me quitaba la razón. Engarróse col xefe de la Policía municipal y salió mal parao. Tuvo milenta xuicios y na Xunta Xeneral de diputáu una temporaduca. Pasólo mui mal, hasta se y-resintió la salú. Yera el suyu un buen exemplu de la necesidá de llendar la duración de los cargos públicos.
Fuera de la vida pública, nunca perdió el enfotu pola política. Últimamente falábamos munchu, llamábame cada vez que sacaba un artículo y les conversaciones facíense interminables. Taba radicálizáu. Dicía que´l PSOE quedaba-y a la derecha. Kiko yera un tipo intelixente y tinía idees propies sobre la política, y mayormente sobre Asturies, el mundu rural y el turismu sostenible. Nunca perdió la gracia y el inxenio. Pero el municipalismu asturianu pierde con su muerte a uno de sus grandes referentes.
