Yá se sienten les palmaes en pechu. Siéntense restallar en dellos espacios qu’aplauden xubes insignificantes. Pasó-y a la Chunta -gran resultáu frente a les xunidaes estatales-; nun-y pasó al estremeñismu que foi eclipsáu pola xunidá estatal; pasa-y a Adelante Andalucía qu’aumenta la so representación quedando como cuarta fuercia nel Parllamentu ensin muncha capacidá d’aición. Dellos aparentes “grandes resultaos” na imposibilidá d’afeutar decisivamente na vida de les Naide. Curiosamente pasa-y a espacios que tovía nun tovieron denguna esperiencia elleutoral y que faen suyo dalgún tipu de resultáu que, como dicía, ye insoficiente.
Ye paecía a esa vanagloria de ciertes estayes de la izquierda española que competía pol penúltimu puestu, p’amosar a otra estaya insignificante que “yera meyor”, o a lo menos “el capaz pa lliderar esi espaciu a la izquierda del PSOE”. Midiciones de gónades pa nada.
Equí quiero facer una posa nel camín pa falar de Madrid. Nel casu madrilanu, Más Madrid, pesie a ser una fuercia que nun ta gobernando, sí que considero que ganó dalgo, y ye la referencia en Madrid d’alternativa. Ye dicir, pesie a tar gobernando’l PP ensin problema, el primer oxetivu qu’ún o una se pue marcar nesa triba d’espacios ye sorpasar al PSOE, que básicamente sedría posicionate nuna situación, como digo, de referencia y alternativa.
Analizando el resultáu elleutoral de les elleiciones andaluces éntrame un poco d’urticaria al ver grandes autoaplausos por básicamente ser penúltimu pudiendo ser referencia -aun perdiendo les elleiciones frentes a les dreches-.
L’únicu territoriu gobernáu por dalguna fuercia territorial d’izquierdes ye curiosamente Asturies que tien, por dicir ún, un Director Xeneral d’una formación claramente soberanista como ye Izquierda Asturiana
El porcentaxe algamao poles llamaes fuercies tresformadores d’Andalucía ye del 15,93%, ye dicir, tendría de ser esi espaciu tercer fuercia del parllamentu y non cuarta y quinta respeutivamente. Los voxenetes d’Andalucía namái que xubieron un escañín colocándose nel 13,82% del votu emitíu.
Sinceramente considero qu’esa xuntanza -bien fecha, non simplemente sopa sigles-, non solo recoyería esi cuásique 16%, sinón que toi convencíu de que comería una bona montonera de votos del PSOE andaluz, pudiendo colocase como referencia-alternativa, que ye’l primer pasu pa poer derrotar a la mole derechista y reaccionaria.
Claro, el casu d’Asturies ye relativamente cómodu, y con ello quiero facer una suerte d’alcordanza:
Galicia: Gobiernu en Mayoría Absoluta del PP
Cantabria: Gobiernu del PP col sofitu de VOX
Euskadi: Gobiernu del PNV con sofitu del PSE
Aragón: Gobiernu del PP con VOX
Castiella y Llión: Gobiernu del PP con VOX
Madrid: Gobiernu del PP
País Valencianu: Gobiernu del PP con VOX
Islles Baleares: Gobiernu del PP con sofitu de VOX
Estremaúra: Gobiernu del PP con VOX
Murcia: Gobiernu del PP col sofitu de VOX
Islles Canaries: Gobiernu de Coalición Canaria col sofitu del PP, ASG y AHI
Andalucía: Gobiernu del PP presumiblemente con VOX
Madrid: Gobiernu en Mayoría Absoluta del PP
Ceuta: Gobiernu del PP
Melilla: Gobiernu en Mayoría Absoluta del PP
Castilla La Mancha: Gobiernu del PSOE de Page
Catalunya: Gobiernu del PSC col sofitu d’ERC y Comuns
Navarra: Gobiernu del PSN col sofitu de Geroa Bai y Contigo-Zurekin
Asturies: Gobiernu de la FSA con Convocatoria por Asturies
Bono, pues esta ye la radiografía del Estáu Español: derecha y derechona. Asina ye España. Pero Asturies, efeutivamente ye diferente: L’únicu territoriu gobernáu por dalguna fuercia territorial d’izquierdes ye curiosamente Asturies que tien, por dicir ún, un Director Xeneral d’una formación claramente soberanista como ye Izquierda Asturiana. Y en tou casu, l’únicu territoriu con dalgún conseyeru de la llamada izquierda a la izquierda de la FSA nesti casu.
Entiendo les múltiples crítiques y desixencies que se puedan facer a esa Conseyería, o a erros que pudiere cometer Izquierda Xunida nel pasáu; pero resulta naïf a vegaes sentir como si de sopitu nada valiere. Como si una formación soberanista cualesquier escaeciere a fuercies implantaes nel territoriu que diz defender, y al tiempu, tornando sobro lo mesmo que yá dixi n’otros artículos, compartir continuamente llueu manifestaciones.
¿Cómo van discurrir les izquierdes asturianes que nun son nin aragoneses, nin estremeñes, nin andaluces, nin madrilanes?
Paez qu’hai interpellaciones cruciaes. El famosu polu asturianu que quier emburriar Aína interpella a sectores que son al tiempu interpellaos por Convocatoria por Asturies.
Asturies nun ye Aragón, nin ye Andalucía, nin ye Estremaúra nin ye Madrid.
Hai minúsculos espacios (PACMA: 3044 votos, Equo, 1574 votos, PCTE 1314 votos y Andecha 1196 votos); y espacios con potencia (Somos Asturies 20.349 votos “tramposos” toa vez qu’hai de dixebrar aquellos que votaron a Podemos pesie a Covadonga, y votantes que nun hubieren votao a Rafa Palacios si esti fuere’l candidatu; o Aína que nun tien representación denguna y, poro, nun se pue midir); y espacios consolidaos (básicamente Izquierda Xunida).
Dientro d’esa Convocatoria por Asturies hai otres formaciones amás d’IX, dalgunes pequeñes pero con un discursu claro como pue ser IAS; otres que surdieron al calor del movimientu Más País, que quedó ciertamente en dalgo testimoñal, pero que sicasí s’incorporó en Convocatoria por Asturies y tien un diputáu venceyáu a esi microespaciu.
Asina qu’ignorar especialmente a Izquierda Xunida, torno dicir, pesie a erros pasaos, o crítiques obvies que se puen facer a cualesquier que xestione una micra de poder, ye un erru de relevancia. Tanto ye asina que la disputa ridícula ente Izquierda Xunida y Podemos Asturies costó nun tener por primer vegada un gobiernu dafechu a la izquierda de la FSA.
Aquellos que pretenden facer ver esi “¿cómo dir con un partíu ancláu a estatal, o cómo dir con quien ta nel gobiernu cola FSA, o con quien de dalguna manera torpedeó superficialmente una reforma del Estatutu que venía con torpeos de toles partes?” Quinxere saber si ye que pretenden sacar el 51% d’escaños, si ye asina cómo lo piensen facer, porque obviamente votaría a esa formación; ¿o ye que, independientemente de los votos sacaos, van a arrenunciar a gobernar?; si ye asina me paez incongruente, toa vez que s’apresenten pa tresformar, cambiar y facer Asturies. Entós queda la situación más probable que ye tener representación y tener d’investir a daquién. Maxino que nun optarán por Queipo como presidenciable -que por cierto, esta vegada va de la manina de Pumares– polo tanto namái quedaría votar al únicu capaz de lliderar un espaciu que nun seya’l PP, hasta’l momentu. Asina quedaríen dos opciones asemeyaes a les de les últimes elleiciones: O bien entrar nel gobiernu -casu de Convocatoria por Asturies (y equí tendríemos de ver si les Direiciones Xenerales y la Conseyería como tal tuvieren meyor que cuando les llevaba la FSA en solitario)-, o bien investilu y tar ente dos tierres, les de sostén de gobiernu y crítica cuando hai de criticar -casu de Somos Asturies-.
Pamidea la xuntanza de toos esos espacios minúsculos (bien porque de dalguna manera sofiten una candidatura Asturiana, radicada y surdida dende los conceyos, y articulada con un envís de gobiernu, intentando sorpasar a la FSA [yá asocedió en 2015]); los espacios potenciales y los enraigonaos, son los que verdaderamente arrepresenten a los y les asturianes -na so infinita heteroxeneidá- de cara a una interpellación tresformadora.
Lo demás son autoescuses pa nun entrar na llamuerga, arremangase y alcordar col diferente col que llueu compartes pancarta, y que potencialmente vas tener d’alcordar nun trámite parllamentariu. Torno a repetir esto porque me paez ilustrativo: dir con aquellos colos que llueu te manifestarás cuando mos quiten o a menorguen los drechos; ya influyir en radicalizar, ecoloxizar, feminizar y soberanizar la plataforma resultante gracies precisamente a la so heteroxeneidá.
Ye raro falar del Pueblu asturianu, y como quien diz, sobranos parte d’esi pueblu. Meter nun mesmu sacu a votantes y a dirixentes. Y un llargu etcétera.
Porque sedría bastante llamentable que, o bien gobernare la FSA como hasta agora -práuticamente ensin naide que-y ponga los puntos sobro les íes-; o bien toviéremos un PP que lo de les universidaes privaes diba facenos hasta risa.
Y yá como colofón: a ver si la FSA dexa de poner la cama a la derechona, y nós, en tracamunidu, y ensin querer, facela.
