La Formación Profesional dexó de ser una opción de segunda pa convertise nuna vía fundamental d’accesu al emplegu y de movilidá social. Con una matriculación que ronda’l 40% de la educación postobligatoria, la FP vive un momentu d’espansión ensin precedentes. Sicasí, esta bonanza de la Formación Profesional pública ta viéndose amenazada por utres que güelen el negociu, siendo fagocitada pola privatización d’esta etapa educativa. N’Asturies, la espansión acelerada de la privada (especialmente semipresencial o virtual) yá supón un pesu del 21%. Namás na FP superior, la privada pasó del 8 % en 2014 al 28,3 % en 2023, convirtiendo esti sector nun filón de negociu. Baxo’l mantra neolliberal de la “colaboración público-privao”, presenciamos en realidá una devaluación ensin precedentes del sistema de Formación Profesional.
Nesti contestu, el profesoráu de los centros públicos asturianos ta poniéndonos n’alerta énte una situación alarmante. Tan alcontrándose cada vez con más casos d’alumnáu que llega a los centros públicos depués de cursar el primer cursu en determinaos centros privaos, especialmente n’enseñances de la familia sanitaria, colos módulos aprobaos pero con carencies práctiques importantes.
La Llei de Formación Profesional de 2022 eliminó’l módulu “Formación en Centros de Trabayu”, integrando la formación na empresa nos própios módulos profesionales a lo llargo de tol ciclu formativu. Estes estancies formatives nes empreses tán sustituyéndose sistemáticamente nos centros privaos por “entornos simulaos”.
La normativa permite recurrir a entornos simulaos de manera escepcional, cuando nun ye posible cubrir los resultaos d’aprendizaxe nuna empresa real. Estos entornos simulaos son espacios d’aprendizaxe físicos o virtuales que recreen l’entornu d’una empresa y les condiciones de trabayu de los puestos. Con too, lo que la norma plantega como una solución d’emerxencia pa determinaes situaciones tasaes, la enseñanza privada ta tresformándolo nuna vía rápida pa precarizar la formación. Úsase la simulación virtual como un mecanismu p’abaratar costos y facilitar el procesu formativu, lo que dexa a estos centros facer caxa aumentando les matrícules ensin la llende qu’impón la busca de puestos de práctiques reales, convirtiendo la FP nun simple negociu d’espedición de títulos.
Cuando falamos de Formación Profesional, falamos de preparar persones pa desempeñar una profesión, non namás d’algamar un títulu. Y hai aprendizaxes que nun puen adquirise detrás d’una pantalla nin nun entornu que reproduza, de manera más o menos fiel, les condiciones d’un puestu de trabayu real.
Mentanto que nos centros públicos l’alumnáu del ramu sanitariu deprende a movilizar a un paciente, a esterilizar instrumental o a tomar les constantes vitales con rigor, presencialidá y ciñu, la FP privada despacha estos conteníos básicos a base de simulaciones. En dellos casos sangrinos de teleformación, la situación denunciada ye entá más grave: apruébense módulos prácticos ensin el menor rastru d’hores presenciales nin contactu directu cola realidá asistencial. Si esto asocede, nun tamos falando namás d’un problema educativu, sinon d’una falta de garantíes na preparación de profesionales que van trabayar con persones.
Como pasa n’otros servicios públicos que vienen sufriendo esti procesu de privatización, les consecuencies pagámosles toos y toes.
Los centros públicos reciben alumnáu que necesita reforzar competencies que tenía que traer yá del primer cursu. El profesoráu tien que partir en munchos casos de cero, cuando había tar trabayando yá aprendizaxes y competencies de segundu cursu y los centros soporten una presión creciente p’atopar empreses y organismos onde facer les práctiques. A esto súmase otra desigualdá: l’alumnáu que cursó primer cursu na rede pública tien que ver cómo los que vienen de la privada coles notes inflaes escueyen per delantre los sitios de práctiques. Sufren les consecuencies tamién a la fin les propies empreses, servicios públicos y sociedá, porque eses persones mal formaes van atender y asistir a los y les pacientes. ¡Menudu negociu! L’aforru ye privao, pero’l coste de la formación acaba siendo público.
Hai años que sentimos que la Formación Profesional ye estratéxica pal futuru económicu y social d’Asturies, que respuende a les necesidaes de les empreses y que les Alministraciones educatives van reforzala. Dicho asina, queda mui guapo. La cuestión ye qué entendemos unes y otros por reforzar, porque hai una diferencia de conceptu ente agrandar l’espaciu de la FP y fortalecer la Formación Profesional.
Lo primero puede facese autorizando más ufierta, más centros privaos y más places. Lo segundo desixe recursos públicos y voluntá política.
Reforzar la Formación Profesional significa invertir nella. Significa talleres y llaboratorios col equipamientu precisu. Significa profesoráu suficiente y ratios razonables. Significa empreses y demás entidaes y organismos de práctiques suficientes y de calidá. Significa una rede pública capaz de responder a la demanda ensin dexar que’l mercáu decida quién pue formase y en qué condiciones. Y significa, tamién, una Inspección Educativa con capacidá real pa comprobar qu’aquello que s’ufierta y evalúa respuende a lo qu’establez cada titulación.
La normativa dexa bien claro que los centros privaos tán sometíos a una estricta autorización alministrativa y que les Alministraciones públiques tienen la obligación llegal de garantizar el so siguimientu, control y supervisión. Nun tamos pidiendo nada estraordinario: tamos desixendo que l’Alministración cumpla coles sos competencies.
Nesti contestu, nun paez casualidá que’l mesmu Ministeriu tea plantegando agora endurecer les esixencies al traviés del Proyeutu de Real Decretu de garantía de calidá de los centros privados del Sistema de Formación Profesional integraos nel sistema educativo, en procesu d’aprobacion. Una intervención llegal d’esti calibre amuesa la urxencia de poner llendes al descontrol. El testu dexa claro qu’hai qu’acabar col supuestu “negociu” de la FP 100% online, obligando a una presencialidá d’ente el 15% y el 39% na modalidá virtual, fixando ratios máximes estrictes d’alumnáu por profesor y esixendo instalaciones afayaíces con garantíes de práctiques n’entornos reales. Si’l Gobiernu se ve forzáu a regular esta realidá con tanto detalle, ye porque reconoz de facto la esistencia de fraudes pedagóxicos qu’amenorguen drásticamente la calidá educativa.
N’Asturies, la Conseyería d’Educación nun puede mirar pa otru llau. SUATEA reclama midíes concretes d’ordenación y control. Esto pasa por activar una Inspección Educativa rigorosa que fiscalice les evaluaciones práctiques nos centros privaos d’Asturies, asina como conxelar la concesión de llicencies nueves p’apertures de macrocentros privaos qu’afiten el so negociu nes titulaciones con más demanda. Pasa tamién por una tresparencia absoluta que dea a conocer públicamente les condiciones de presencialidá y los recursos de los centros autorizaos.
Pero’l control nun basta. La respuesta definitiva pasa por apostar pola FP pública, ampliar les places que faigan falta, dotar de recursos los ciclos sanitarios y garantizar que tol alumnáu pueda formase en condiciones dignes y d’igualdá.
Dende la perspectiva de SUATEA, entendemos que la educación nun puede quedar al debalu de la lóxica del mercáu, yá que tamos delantre d’una desvalorización progresiva de los títulos que pon en riesgu’l futuru del nuestru mercáu llaboral y la calidá de los propios servicios públicos.
La Formación Profesional tien que seguir siendo sinónimu de calidá, dignidá llaboral y serviciu social. SUATEA nun va dexar que la Formación Profesional pública asturiana pague les consecuencies d’una espansión de la ufierta ensin control suficiente nin que les regles del mercáu conviertan les aules de la FP nun paseín d’aprobaos fáciles a costa de la salud y el futuru de toes y toos.
La cualificación nun ye un artificiu virtual y, decididamente, la educación pública nun ye un simulacru.
