Ye yá un clásicu, el hit de la patronal. El cantar titúlase: “Vacantes llaborales” y nos caberos meses el tema volvió a sonar con empeñu.
A les patronales de la construcción y de la hostelería présta-yos tocalu mui en particular. Nun hai nin comparecencia nin entrevista onde nun se quexen de que nun topen personal pa trabayar, a pesar de qu’Asturies zarró’l mes d’agostu con 54.417 persones rexistraes como paraes nes oficines del Serviciu Públicu d’Emplegu, más de cuatro mil na construcción (4.086), cerca de cuarenta mil (39.825) nel sector servicios.
Así qu’un día ponémonos a confirmalo con datos y, ¡concho!, los datos nun cuadren coles sos quexes. ¿Fake new? ¿Desconocimientu estadísticu? ¿Desviación interesada de l’atención? Pue haber de too. Nun seamos malpensaos.
Pero vamos a les fontes. Entamemos per Eurostat. Acordies cola Oficina Europea d’Estadística (que de xuru que nun tien el más mínimu interés n’engañar al personal nin alliniase col nuestru sindicatu), España ta a la cola d’Europa en puestos de trabayu ensin cubrir: en concreto el 0,9% frente al 2,8% de media de los Veintisiete. Queda bien claro. Y por muncho que restuercen los datos nun van dicir lo que tu quieras, nun van dicir otra cosa.
Depués tenemos la Encuesta Trimestral del Coste Llaboral del INE (Institutu Nacional d’Estadística). Pues bien, nel so últimu informe estima en 1.326 el númberu de vacantes llaborales n’Asturies. ¡1.326!
Vamos paranos equí un momentu, porque’l 9 de payares de 2022 la Federación Asturiana d’Empresarios aseguró qu’había n’Asturies 6.000 emplegos ensin cubrir. Darréu d’ello, vuelven a nun cuadrar los datos coles “demandes”. Llamaderamente.
Partiendo de les fontes mencionaes, el gabinete técnicu del nuestru sindicatu calculó que’l númberu de vacantes en tol país na estaya de la construcción sedría de 6.200, 8.217 pal casu de la hostelería. Así que nun cuadra nada.
El propiu Ministeriu de Trabayu insistió bien de veces en que n’España nun hai un problema de mano d’obra y que les vacantes son mui poques en rellación a la población ocupao (149.645 nel primer trimestre del añu frente a 21 millones de persones trabayadores).
Inclusive’l Conseyu Económicu y Social (CES) estatal encara’l tema na so última memoria, na que reconoz que (anque ye verdá que pue haber dalgún problema pa cubrir mano d’obra cualificao en casos mui concretos) les males condiciones llaborales taríen detrás del problema n’estayes como la hostelería. Así que nun ye solo CCOO quien apuntó nesa dirección.
Bien ye verdá qu’empresarios y sindicatos tuvimos d’alcuerdu nes dificultaes pa cubrir dellos puestos específicos en sectores tecnolóxicos y de la industria metalúrxica, hasta n’arees concretes de la construcción, emplegos que van esixir dir adaptando la formación a la realidá de cada empresa, pero eso nun tien gota que ver coles quexes de les patronales de la hostelería y de la construcción n’Asturies, onde hai munchu marxe de meyora de les condiciones llaborales y salariales que s’ufierten pa que resulten emplegos atrayentes.
FADE dio anuncia hai dellos díes de que va dar a conocencia pública un estudiu col que se comprobaría que sí tienen problemes pa cubrir puestos de trabayu, sobre too na hostelería y na construcción, pero yá nos anticipó que nun s’incluyen les razones daes por quien los rechacen, porque “ye mui difícil…”. En fin, dicimos que, pero depués nun podemos esplicar por. Anque nos datos del Institutu Nacional d’Estadística sí vien recoyío qu’ente esa entruga al empresariáu, cenciella y llanamente respuende que nun 90% los puestos de trabayu que nun se cubren ye porque nun lo consideren necesario.
Pero hai esplicación. Delles esplicaciones. Necesitamos iguar la formación y sobre too impulsar la FP Dual; ameyorar la intermediación de los servicios públicos d’Emplegu y que los empresarios fagan usu d’ellos; contiar un modelu productivu más afitáu na industria, cola I+D como motor; y, sobre manera, ufiertar emplegos decentes y salarios dignos pa que la clas trabayadora puea facer decentemente’l so trabayu y vivir d’él con dignidá.
Evitaríamos munchos problemes. Y dexaríamos de sentir esi vieyu cantar, que nunca termina de sonar bien.
