A mediu camín ente’l rock noventeru, l’indie y la canción d’autor. Intensa y contundente. Col bon facer de quien lleva más d’una década tocando n’otros proyectos como Napoka Iria. Asina ye MICE, l’alter egu de Miren Narbaiza y la so banda que’l domingu 3 d’avientu van presentar el so tercer discu, ‘Lautada’, nel Mieres Centru Cultural, a les 19.30h y con entrada llibre.
El conciertu ta entamáu por Ixuxú Cultura -promotora especializada en música fecha en llingües minorizaes y/o por muyeres- y tien l’apoyu de la estaya de Cultura del Ayuntamientu de Mieres. Coincide amás que’l 3 d’avientu ye’l Día Internacional del Euskera, y con esti eventu dende’l Conceyu celebren la fiesta de la llingua vasca nuna apuesta por fomentar la diversidá llingüística y el diálogu intercultural.
Ente’l 25 de payares y el 23 d’avientu MICE va dar 10 conciertos per Bizkaia, Galicia, Asturies, Valencia, Murcia, Cataluña y Madrid. Nellos va presentar ‘Lautada’, un álbum onde Miren Narbaiza recuerda a PJ Harvey o Cat Power, con una escencia mui indie-rock de los 90 y a traviés de la que fai xugueteos electrónicos con tormentes guitarreres, amás d’invitaciones al groove. Too ello cola so personal voz enllena de colores, lluces y testures.
