Cellebróse na Xunta Xeneral del Principáu d’Asturies la Mesa de la Comisión de Facienda y Fondos Europeos, na qu’a lo llargo del día distintos axentes sociales tuvieron compareciendo ante los Grupos Parlamentarios sobre’l borrador del presupuestu asturianu pa 2024. Xicu Ariza, responsable de Musicasturiana.com, tuvo convidáu por Podemos Asturies en calidá d’espertu n’Industries Culturales y Creatives (ICC). Compartió sesión con otres once persones venceyaes al sector cultural dende l’ámbitu profesional y asociativu que tuvieron un diagnósticu unánime y contundente: nun se tán tomando les midíes necesaries pa que les ICC espoxiguen n’Asturies.
Aprovechando la ocasión, Ariza tuvo trabayando voluntariamente na ellaboración del informe La Necesidad de Apostar por el Desarrollo de las Industrias Culturales y Creativas Asturianas. A lo llargo de 52 páxines, esti documentu quier facer un llamamientu a los representantes políticos asturianos pa tresmiti-yos la necesidá de que valoren a les ICC como una oportunidá pal desarrollu económicu, social y cultural y, por tanto, s’apueste por desendolcar unes polítiques culturales planificaes, estables y ambicioses que sirvan pa ponenos al altor d’otres Comunidaes Autónomes y pa retener población y talentu xoven.
El documentu recueye conceptos básicos rellacionaos con esta materia; resume les principales directrices y recomendaciones qu’organismos como la UNESCO o la UE lleven décades plantegando y que los sucesivos gobiernos asturianos fueron ignorando; sintetiza dalgunes característiques del sector cultural asturianu; y espón les principales polítiques culturales desarrollaes a lo llargo de 40 años d’autonomía. Por último, esbilla les propuestes pa Cultura que plantegaron los partíos políticos con representación parlamentaria nos sos programes electorales de 2023; observa’l borrador de presupuestos de 2024 y plantega una serie de polítiques que podríen facese pa da-y puxu al desarrollu de les ICC n’Asturies.
Datos y comparatives
L’informe, críticu a la par que propositivu, ufre tamién una serie de datos como que’l presupuestu asturianu pa cultura “baxó de representar en rellación al total cuasi’l 3% (2005 y 2006) al 0,61% (2023) o qu’esti sector da empléu a 11.000 persones n’Asturies, lo que supón un 2,9% del empléu total. Esta cifra asítianos nel últimu puestu d’ente toles Comunidaes Autónomes, un datu grave si tenemos en cuenta qu’esti sector ye de los que más rápido ta medrando a nivel mundial y que más emplega a la población mozo”.
Amás, el documentu establez comparatives con otres CC.AA. Asina sorraya que “Navarra (con unes cifres presupuestaries y un gobiernu asemeyáu al asturianu) invirtió en 2023 en cultura 80 millones frente a los 35 millones d’Asturies o que les sos subvenciones a les ICC fueron de cuasi 4 millones frente al poco más d’un millón d’equí. Perres aparte, ilústrense dalgunes de les polítiques culturales que Navarra, País Vascu o Galicia lleven años desendolcando y tamién criticase la ruina presencia que, si la comparamos col territoriu vecín, tien la cultura asturiana nel propiu Estatutu d’Autonomía o na llexislación cultural desendolcada en 40 años d’autonomía”
Sector cultural marxináu
Xicu Ariza va presentar l’informe a los distintos grupos parlamentarios col enfotu de qu’haiga un xiru na política cultural asturiana. Amás, los conteníos y conclusiones presentes nél, viéronse reforzaos dafechu porque’l diagnósticu realizáu ayeri polos otros once comparecientes foi asemeyáu. Hubo una crítica prácticamente unánime a l’ausencia d’unes polítiques culturales adaptaes al añu 2023 y a les necesidaes de les ICC asturianes, amás que compartieron la necesidá de que s’afite un Plan Estratéxicu pa la Cultura Asturiana.
