La seición d’Educación del sindicatu Izquierda Sindical Asturiana (ISA), ñacíu n’ochobre pasáu, denuncia que, magar de conocese dende va selmanes les vacantes que diben xenerase pol concursu de tresllados de personal laboral y el perxuiciu que diba producise de non cubriles, varios centros escolares siguen entá ensin personal de cocina bastante pa tener serviciu de comedor. La circunstancia, diz la ISA, “obliga a los centros a contratar con empreses de catering la prestación del serviciu” hasta qu’eses places queden cubiertes con personal públicu.
“Esternalizar el serviciu de comedor nunca nun puede ser una solución” pal sindicatu, nin siquier de forma puntual. “Llevamos munchu tiempo viendo cómo cada vegada que s’esternaliza un serviciu piérdese calidá y auméntase’l coste pa les families, poro, nun entendemos que se recurra a esti sistema cuando l’alministración cunta con una bolsa de profesionales disponibles p’asumir el serviciu de cocina de forma inmediata”.
Izquierda Sindical Asturiana púnxose en contautu cola función pública pa reclamar la cobertura d’estes vacantes ya informar de los problemes xeneraos en dellos centros nos que, dicen, el llega inclusives a trascendese del serviciu de cocina yá que “falten por cubrir otres places de personal llaboral como ausiliares, educadores y operarios de servicios”.
