Anden les fuercies parllamentaries de la Xunta Xeneral, d’esquierda a derecha, coincidiendo dafechu. Failo, tamién, el lobby de los empresarios y dellos sindicatos: toos a una. “El pautu fiscal catalán perxudica a Asturies”. Dícenlo cola boca grandona y con ello déxennos enriba la mesa dos idees: que’l statu quo de la financiación d’anguaño ye tolerable p’Asturies y que les perres de que disponemos pa facer polítiques públiques tán cuntaes.
N’Aína refugamos los dos marcos discursivos: ún por evidente, porque la situación socioeconómica asturiana d’anguaño y d’antaño diznos lo contrario; l’otru, porque, como se dicía nes places del 15M, “creeremos na crisis cuando veamos suicidase a los banqueros”.
Les fuercies vives sucursalistes esprecétense cuando les organizaciones polítiques catalanes rispen polos sos intereses económicos y, poro, de clas. Y échen-yos la culpa a esos partíos que tienen la llave de la gobernabilidá estatal, nacional y en conceyos, d’un presuntu agraviu pa la fiscalidá asturiana. Estes organizaciones echen mano de la política y de la representatividá qu’algamen pa consiguir pautos que respuenden a los sos intereses y faenlo llexítimamente, al marxe de les diferencies polítiques que nós podamos tener con elles.
¿Y n’Asturies? Equí nun podemos nin tenemos ferramientes pa facelo. Non, porque los partíos que presuntamente representen los intereses del eleutoráu asturianu voten, en masa, coles centrales afitaes en Madrid. ¿Daquién imaxina a un representante políticu escoyíu por Asturies votando a la escontra d’una direutiva central porque ésta nun favorez a la economía asturiana? ¿Con qué, sinón col votu, va negociar una representante por Asturies p’algamar polítiques interesantes pal país? ¿Cómo va facelo si’l votu ta dau a Madrid, automáticamente, na nueche del domingu eleutoral?
Con esta lóxica discursiva tan perversa, cuando Madrid, o Cataluña, o Galicia o Teruel tienen representantes que rispen polo suyo… automáticamente Asturies pierde. Ye dicir: la culpa de que naide nun mire polos intereses económicos y sociales específicos d’Asturies nun ye de los y les asturianes, que nun mandamos a xente que lo faiga a les instituciones onde se decide… sinón de los que sí miren polo suyo. Nesi discursu de “la renuncia”, enunciáu mui acertadamente por David Guardado nel yá imprescindible “Nunca Vencida” (Ed. La Fabriquina, 2023) Asturies arrenuncia a ser y mira, con envidia, a quien sí lo fai, pudiendo facer lo contrario.
N’Aína, a diferencia de lo que tamos viendo na prensa estos díes, tenemos otru plan estremáu al quexase porque otros miren polo suyo: llámase mirar polo d’equí. Pero pa ello hemos tener una representación institucional asturiana, como sí tienen otros territorios del estáu, pa poder falar de tu a tu con quien diseña presupuestos colos que se faen polítiques públiques. Nun hai escuses: nun momentu nel que’l sistema de partíos estatal va haza lo plurinacional, nel que los parllamentos y los plenos municipales tán compuestos por más grupos que nunca… Asturies sigue ensin mirar polo suyo esperando qu’otros que nengún interés puen tener nello lo faigan.
Ye’l tiempu de les propuestes reales: hemos cuantificar qué pasa colo que se produz n’Asturies; hemos falar de fiscalidá y progresividá; hemos detectar cuánto se declara equí y cuánto nes comunidaes que faen dumping fiscal; hemos demandar la delda histórica pa con un país que foi pila enerxética ya industrial, pa con una Asturies que punxo los recursos naturales, la mano d’obra, la salú y el territoriu esfarrapáu; hemos apostar por una Axencia Tributaria propia, porque tresferencia de competencies ensin fiscalidá propia nun ye más qu’un decoráu de cartón piedra; hemos pensar nuna Banca Pública asturiana que tenga capacidá pa estimular la economía en favor del interés popular… En fin, hai qu’apostar por idees que se centren nuna Asturies que recueya lo meyor de sigo mesma y ponga los finxos pa un futuru meyor. Más que protestar porque otros se muevan: movenos nós yá y querenos un poco. Autoestima, d’equí a 2027.
