Ente’l 3 y 6 d’ochobre va tener llugar la Folixa la Sidre de Ribeseya, entamada pola asociación cultural Entaina Ribeseya, nel parking del Campu les Rolles, al lláu de la Plaza d’Abastos.
L’eventu va dar entamu el xueves con cantares de chigre, percorriendo les sidreríes patrocinadores de la villa col acompañamientu de les bandines Los Muiles y L’Andecha Turcipié.
El vienres va tener llugar la inauguración a les 20:00 hores de la mán de Banda Gaites Ribeseya y Joaquín Pajarón, pregoneru d’esta edición de la Folixa.
A lo llargu del sábadu y domingu va podese esfrutar de distintes actividáes como xuegos tradicionales, llucha baltu, pasucais y actuaciones de les bandes de gaites El Gumial y del grupu de baille Práu Llerón.
El sábadu va tener llugar el IV concursu de gaiteros Gelu Cuervo, a les 10:30 hores, y el domingu, el VIII concursu de sidre caseru de Ribeseya y la preba popular, a partir de les 12.30 hores. A les 17:30 hores va desendolcase el XXXI Campeonatu oficial d’escanciaores.
Pa la reciella va haber actividáes, asina como un pintacares a lo llargu de los dos díes de la fin de selmana.
Les nueches de la Folixa nun queden vacíes: el vienres pela nueche va haber una mezcla d’estilos y versiones de la mán d’Avalle Van y Girls To The Front, que va cerrar D Kapi. El sábadu va cuntase, al mediodía, con 6 Riales pa la sesión vermú, mientres que la nueche va cuntar con ambiente folk coles actuaciones de Draque, Corquiéu, Alienda y DJ La Güeriata pa finalizar.
Una fin de selmana enllena de bon ambiente, música y muncha, muncha sidre.
