“Esto, ¿qué ye? Esto ye dalgo”, entrugábase ayeri, con autorrempuesta incluyida, una de les visitantes que, magar del orbayu pertinaz -en dalgún momento llegó a ser lluvia fuerte-, esfrutaron n’Uviéu de la Noche Blanca. Facíalo a la entrada del patiu del Edificiu Históricu de la Universidá, onde seis poetes esponíense al públicu col oxetivu de facer, mentres tres hores, poemes improvisáos al rodiu de la pallabra que’l visitante-yos dixere tres ver el so reflexu nun espeyu. “Ego, la poética del reflejo’, del colectivu Hablalatinta, foi solo una de les múltiples actividáes desendolcáes a lo llargu de tóo Uviéu nuna nueche na que, eso sí, nun hebo rastro de la tradicional visita guiada polos escenarios de la Revolución d’Ochobre, cumpliéndose esta fin de selmana 90 años del so españíu.
Sí hebo percorríos pola memoria industrial de la ciudá, a cargu de la Fundación Juan Muñiz Zapico, pol edificiu de la Cámara de Comerciu d’Uviéu y pol padremoñu históricu artísticu de la Fábrica d’Armes de la Vega. Ellí, concretamente nel claustru, tuvo llugar ún de los espectáculos más esperáos de la nueche. Flux, la espectacular propuesta de Collectif Scale con música de Grégory Sémah, coordinada pol Llaboratoriu d’Electrónica Visual LEV. Impresionó, como tamién Immersion, nel edificiu de la antigua sede de Banesto, esta vegada de la mán de Robbie Cooper.
Pa los más clásicos, debatieron Manuel Jabois y Edu Galán nel teatru Filarmónica y abriéronse les puertes del Monasteriu de les Pelayes, onde, mentres una hora, los visitantes pudieron sentir a les monxes benedictines cantar les vísperas y les completes. Previamente, y con presencia de dalgunes relixioses pelos pasiellos mirando curioses la marabunta de públicu, pudieron vese les entrañes del monasteriu, una esperiencia poques veces alcanzable. A solo unos metros, y con reciella presente qu’asistía atónita a los xuegos de lluz y música de la Factoría Norte, los Dormiyosos tuvieron de guarecese de la lluvia baxo los techos del Muséu Arqueolóxicu, na cai San Vicente.
Un mundu fantásticu al que tamién tresportaron, nel edificio de Trascorrales, l’arpista Angélica Salvi, la mallorquina Sofía y, ataviada con un pañuelu palestín y dalgún qu’otru problema de soníu, tamién l’arxentina francesa Fiesta en el Vacío. Hebo música, muncha: en Trascorrales siguieron Ddificil, Dirty Suc y l0rna cola música contemporánea que tamién tuvo presente nos almacenes Kuivi con José Puebla; y la clásica alcontró güecu nel Filarmónica, cola conversión de pieces de Bach o Beethoven a los ritmos ‘jazz’, y na catedral col espectáculo ‘Vox Clamantis’. Un ‘music-track’ estacionáu na Escandalera llevó’l rock a los que nun tuvieren miéu de la música y nel Muséu Arqueolóxicu, nuna esperiencia inmersiva ensin igual, tamién los ritmos y modos de vidamás primitivos. Pa tolos públicos, nuna sola nueche, asina brilló Uviéu
Semeyes: David Aguilar Sánchez
