Con idioma propiu, igual que na clase de les aves lleva faciéndolo mentres años Mariquina la Galana, abanderada paxaril de la llingua asturiana, asina s’enfrentaron, va 400 años, les tolines a los pescaores candasinos. Con esta hestoria como fitu principal, y entrellazada col recuerdu d’Anton de Marirreguera, primer escritor conocíu n’asturianu, va pasease el Bardu Errante (Ánxel Nava) pela Fábrica d’Ortiz (Candás) pa dar iniciu al III guerada Fest.
L’aición, titulada La voz de la nortiada, cuntará cola presentación bárdica de Nava el viernes 11 d’ochobre, a les 17 hores, na que será la espita qu’abra una fin de selmana enllena d’actividáes, conciertos y mercáu de productores n’asturianu de tolos ámbitos. Mentres los tres díes, la instalación, que supón la segunda collaboración de Nava col realizador audiovisual Sergio Redruello, va cuntar visual y sonoramente la hestoria qu’enfrentó, según documentos calteníos anguaño nel Archivu Históricu d’Asturies, a les toliñes nos tiempos nos qu’Antón de Marirreguera tinía venti años.
La plena mocedá del poeta cuyu recuerdu conmemora’l propiu nome del Reguerada Fest tuvo continuación nos años siguientes colos sos versos, según Carlos González Posada tovía caltriáos na memoria de la mocedá de finales del sieglu XVIII. Tamién pa la mocedá, nesti casu la del sieglu XXI, quier falar el bardu errante, por mediu de la instalación de pantalles y rederes nes muries de la fábrica d’Ortiz. La voz de la nortiada va convivir con talleres de cosplay (a cargu de Blanca Fernández Quintana, a les 19:30 hores del viernes), gastronómicos (con Lluis Nel Estrada, a les 12:30 del domingu), de baille, bordáos o composición de cantares, y tamién colos conciertos, a les 20.30, de Marisa Valle Roso el viernes y Skama la Rede el sábadu.
Quier ser tamién La voz de la nortiada motivu pa la reflexón. El pleitu, pallabra que comparte l’episodiu de les toliñes con unu de los poemes de Marirreguera (Pleitu ente Uvieo y Mérida poles cenices de Santa Olaya), va referise nesta instalación tamién al inacabáu enfrentamientu que na sociedá produz l’usu del asturianu. Un problema qu’entama yá a difuminase y que paez nun esistir pa les decenes de productores que van tar ufriendolos sos productos, fechos col asturianu como llingua vehicular nel Reguerada Fest. Va haber dende llibros hasta ropa; compañíes de telefonía, estudios fotográficos, cerveza, artesanía y visites guiaes.
Sostiense l’idioma de Mariquina la Galana igual que, según los maoríes, tamién les toliñes sostienen la memoria de la mar. Va entamar esti viernes, col bardu errante. Y hasta la mañana del domingo.
