El xuráu del certamen seleccionó pal so pasu a la final a dos aspirantes por caúna de les modalidáes qu’abarca’l galardón: absoluta feminina, absoluta masculina y moza, dempués de les tres semifinales que se cellebraron esti mes en Cangas del Narcea, La Pola y La Felguera.
Los seleccionaos son Lorena Corripio y Alicia Villanueva, na estaya feminina; Sergio Menéndez y Carlos Velasco, na masculina, y Néstor Díaz y Marina Carbajosa, na moza.
La final va cellebrase’l vienres 29 de payares nuna gala nel Teatru de la Llaboral en Xixón, a les 19 hores, con entrada de baldre.
La Conseyería de Cultura, Política Llingüística y Deporte destina una suma de 15.000 euros a esti galardón, distribuyíos en 6.000 pa la estaya masculina, 6.000 pa la feminina y 3.000 pa la moza.
Con esta iniciativa persíguese promover y difundir la canción asturiana, declarada Bien d’Interés Cultural (BIC), de calter inmaterial en 2015.
Cultura escoyó la figura d’Obdulia Álvarez Díaz, más conocía como ‘ala Busdonga’, pa dar nome a esti certamen de música asturiana col envís de reivindicar la trayectoria d’una muyer que na primer metá del sieglu XX impúsose a los estereotipos de la dómina y destacó pol so talentu musical.
