Anda la Profe Quemada, yá chamuscada a estes altures del cursu, sepultada nuna montonera de papeles que vinieron directos de la papelera de Navia pa dotar de conteníu a los centros educativos. Eso parez ser, sí. Y n’El Amazonas cuéntase con repoblar con más árboles, nun vaya a ser qu’haya dalgún neñu, quiciás una rapacina, que quede ensin la so reglamentaria ficha por triplicao que demuestra que tien una profesora, un maestru, que s’esmolez con burocrática eficiencia pol so futuru.
Yá sabe la Profe Quemada que tamién ta la opción dixital, que sí, que nun va ser el mayor problema’l marafundiu de papel: asina que documenta y archiva, documenta y archiva, documenta y archiva… Será por dixitalización, que con Teams tenemos serviciu d’educación 24 hores online. Y el Onedrive, y l’Idoceo, y l’Additio y santu Excel… Y la pizarra dixital, y el proyector, y el iPad… Qu’a lo meyor después nun va Internet nel insti, o esa pantalla nun conecta, o esti proyector nunca funciona, o el soníu, que nun s’oye, y nuna espectacular, innovadora y improvisada voltereta cambia la clas dixital pola analóxica. Siempre con una antigua tiza y un rotu de reserva na cartera pa emerxencies.
La Profe Quemada lleva dos años faciendo programaciones, a entregar en xunu -too mui lóxico- cual si d’una empresa editorial fuera asalariada. Tampoco nun sobraba’l gabinete xurídicu pal abegosu proceso de reclamaciones que s’asoceden al final del cursu. Siempre en sospecha la presunta cruel Profe Quemada: tola vida evaluando, que d’eso sabe, pero agora devalúenla. Asina que s’abelluga tres d’una trinchera de rúbriques, criterios de corrección y competencies malamente algamaes, decimales con dos dígitos y una media fecha a mano, n’Excel y con calculadora, será por comprobaciones, pa xustificar, por enésima vez, que sabe facer el so trabayu.
Nel campu de batalla cuasi yá nin se respira ente PTIs (Plan de Trabayu Individualizáu) pal alumnáu con NEAE (Necesidaes Específiques d’Apoyu Educativu); Planes d’Acción Tutorial, adaptaciones curriculares significatives o metodolóxiques, por qué non; programaciones; unidades didáctiques; situaciones d’aprendizaxe; programes de refuerciu; actes de departamentu; memories del departamentu; actes de Reuniones d’Equipos Docentes; actes de tutoría; actes de la salida estraescolar; memoria de la salida estraescolar; acta pa l’actividá complementaria; memoria de l’actividá complementaria; acta del parte col so correspondiente parte; más el corréu a la familia, y un tokapp, just in case. Anda un poco “hacta” la Profe Quemada.
A los sos 32 años, la Profe Quemada interina enllamárgase ente nuevos procedimientos burocráticos de centru en centru. A los 56, nada de mengua horaria, anque emocionalmente, físicamente, cada vez cuesta más entrar nuna clas formada poles criatures d’una sociedá que sabe munchísimo de los sos derechos (los individuales y esclusivos) y poco de los sociales (eso del derechu a la educación, los derechos llaborales, el respeto debíu a los otros seres humanos, a la llibertá de cátedra…).
Suaña la Profe Quemada con una baxada de ratios. Espera y comprende que pa eso habían contratar más profesoráu y que la Conseyería ye más amiga de gastar en tecnoloxía qu’en personal. Asina que la pizarra dixital, cola so cuota de reciella correspondiente mirando’l so futuru fundíu en negro, queda en modo suspensión, porque lo de que los centros anden col personal en mínimos ye una de les grandes aficiones de la Conseyería. La xente da problemes, hasta dignidá pide. La tecnoloxía ruempe, escachárrase, calla y aguanta tonelaes descomanaes de papel. Ónde va parar.
Va tirando la Profe Quemada col so salariu, que se devalúa al ritmu de la profesión, siendo la que menos cobra ente’l profesoráu del Estáu español. Sacó de la manga la Conseyería d’Educación una carrera profesional a la que nun pue optar tol mundu (escaecéivos interines y interinos de trayectoria curtia de cobrar lo mesmo que’l restu del equipu docente) y racanea na inversión al sector.
Asina que, en resume, “hacta”, fartuca ta la profe Quemada, qu’esti cursu va itinerar pelos diferentes centros educativos d’Asturies pa sentir a los sos compañeros y compañeres. Da-y a ella que nun ye la única qu’echa fumu, que ta más que chamuscada… Asina que va xuntase con otros profes, llibreta en mano, pa recoyer les reivindicaciones de les y los docentes, que tán distintes de les suyes nun van ser.
El miércoles 4 d’avientu l’Asamblea de Profesoráu del Centro-Oriente llevóla pa la escuela de Nava y el 13 d’esti mesmu mes cuenta tar nel IES Peñamayor, también de Nava. Otres paraes previstes son: CP de Sariegu, CP Xentiquina de Lieres, CP Martimporra de Bimenes, CRA Coroña (Cecea), IES de L’Infiestu, IES de Cangues d’Onís, IES Río Nora, de La Pola (Siero)… Y más qu’habrá, que’l cursu ye llargu y les de la so especie son mayoría.
