Tradición, identidá y autenticidá son conceptos alredor de los que Leticia Baselgas—metá del dúu L-R y una de les panderetes más importantes del panorama musical n’Asturies— lleva reflexonando de magar yera una neña y que, agora, aborda en forma d’ensayu nestos trepidantes diarios personales escritos per más de dos décades.
Con ritmu cinematográficu y la guía d’una documentada brúxula teórica, Baselgas rellata les sos primeres esperiencies nun grupu de baille marcaes pola disciplina y l’imaxinariu folclóricu posfranquista; el so posterior desencantu cola música tradicional y el rigorismu etnográfico; y, pa cabu, la so llegada al conceptu de post-folk-asturianu como un espaciu de llibertá creativa.
La presentación n’Uvíeu será el vienres 13 d’avientu, a les 19:00h, na Llibrería Matadero Uno (Plaza de Riego, 1) y contará cola presencia de l’autora, Leticia Baselgas, el prologuista de la obra, David Guardado, y la llibrera Natalia González Menéndez.
