Como ye natural, y como tienen pedío tolos idiomes en situación de minorización llingüística del mundu, l’asturianu aspiraba nos años setenta a una enseñanza formal, esto ye: el pasu de los primeros documentos de normativización – normes ortográfiques, diccionarios breves – como ferramientes pal sistema educativu. Precisando tovía un poco más, la llingua oral que resistiere con relativa buena salú les últimes décades, quería tener la posibilidá d’espresase per escrito con traza y, sobre manera, demostrase a ella mesma y los sectores – munchos – que lo duldaben, que yera posible entrar na casa con más prestixu de toes, la educativa, con dignidá y equiparación de condiciones. Demostrando al tiempu al alumnáu asturfalante que decir un “ye”en clase yá nun diba ser oxetu de reprimenda per parte’l maestru y que s’abría un espaciu, la clase d’asturianu, onde diba a ponese en valor esa vocación billingüe a la qu’aspiraben.
Partiendo d’esta base, casi consecuencia necesaria de cualquier procesu organizáu de vindicación llingüística, les persones d’esti movimientu, del nuestru en particular, ficieron del “Asturianu nes escueles” la primer petición que retrañía nos despachos del poder políticu. El restu, la ellaboración de la norma escrita, la recoyida de material oral y d’archivu o la creación de documentos lliterarios y periodísticos; yera un trabayu individual que naide, agora yá non, podía frenar y pal qu’había talentu bastante pa llevar alantre. Asina se presenten, como símbolos, les semeyes de la pintada “Bable nes escueles” o de la sábana blanca sobre la que podía lleese “Bable a la escuela. Autonomía rexonal” abriendo la manifestación más multitudinaria de la nuestra transición, nel añu 1974 en Xixón.
Nun yera, polo tanto, una petición menor con pocu apoyu social (y sorrayo, porque fue una reclamación – facéi cuentes – que duró diez años), a la que fueron adelantándose otres demandes históriques, como la creación de l’Academia de la Llingua Asturiana. Asina les coses, nel cursu 1984/1985, del qu’agora cumplimos cuarenta años, entra l’asignatura (y vuelvo a sorrayar, l’asignatura, porque l’asturianu como llingua educativa pal alumnáu que la tien como materna nunca fue una realidá) en seis centros pilotu d’Asturies semaos pela nuestra xeografía de manera non casual: Blimea (cuenca del Nalón), Xixón, Avilés, Cangues d’Onís, Cangas del Narcea y Mieres (cuenca del Caudal). Esti últimu, el Llerón-Clarín, acoyó nesti mes de payares les celebraciones oficiales d’esti aniversariu al que, de dalguna manera, yo tamién quiero sumame con esti artículu.
Y hasta aquí la parte teórica d’esti testu que quiero abordar dende una perspectiva asumidamente parcial y, a lo meyor, tamién emocional, como persona que recibe l’asignatura na escuela, imparte asturianu como especialista durante ocho años y escueye destín como funcionaria de carrera y tutora de primaria nel mesmu colexu nel qu’estudió y que, ensin ser del “clú de los seis”, sí ta na primer llinia de la escolarización n’asturianu dende’l cursu siguiente (1985/86) y depués del preste del Serviciu d’Inspección Educativa al “esperimentu” del añu anterior.
La llamada nel Decretu asignatura de Llingua Asturiana siempre fue una materia de calter voluntariu, los neños y neñes, o meyor, les sos families, siempre tuvieron la capacidá de decir que non a la enseñanza d’esti segundu (o tercer idioma) y tar atendíos igualmente por un docente nel aula. Esa opción, cuando yo yera neña, podríemos decir que yera una alternativa ensin esplotar, porque’l mio recuerdu ye que pasábemos de Matemátiques a Asturianu cola mesma naturalidá que lo facíemos en cualesquier otra asignatura, en bloque (ye decir, tolos rapacinos y rapacines) y ensin cambiar d’aula. Naquel momentu la formación docente, organizada de manera apresurada pa responder a la demanda, consistía nunos cursos de branu, de manera que, una parte grande de docentes con un poco de sensibilidá pa col tema, facíen los cursos y atendíen nes hores d’Asturianu al so alumnáu. Voi ser más esplícita: yeren, nos más de los casos, los y les tutores los que s’escargaben d’esta asignatura, siendo por embargu les persones más implicaes o conocedores del idioma los que coordinaben les reuniones del departamentu (sí, na mio escuela hubo Departamentu de Llingua Asturiana) y ellaboraben materiales y propuestes pedagóxiques pa seguir nel centru. Y atención, porque esos materiales nun yeren namás llistes de vocabulariu, comprensiones llectores o fiches pa saber cómo apostrofar. Fueron en munchos casos los y les docentes d’asturianu los que punxeron en marcha iniciatives qu’agora nos paecen cotidianes polo xeneralizaes: l’amagüestu, la plantación nes finques de los colexos d’árboles autóctonos, la instalación de boleres, la celebración de la Selmana les Lletres, la música asturiana nes aules… y un llargu etcétera. Yeren eses persones les que-y poníen contestu al idioma que la escuela falaba, dacuando con non pocu esfuerzu personal, y a costa de facer, facer muncho, y ponelo en común por exemplu un día del fin de selmana, d’alcuerdu colo que me cuntaba hai años Pablo Xuan Manzano, coordinador de les enseñances de Llingua Asturiana daquella.
Y sí, yera l’idioma que la escuela falaba naquellos ochenta, porque los mios compañeros y compañeres yeren fíos de la mina, y fíos de les caseríes, y al contrario que les xeneraciones que los precedieron teníen na escuela un aliáu idiomáticu que-yos decía qu’aquello taba bien, que la llingua de casa tamién valía pa los cuentos impresos, y pa escribir nes llibretes y pa que la falare’l señor maestru. La escuela por fin yera un espaciu pa empoderase como falantes ensin sentir vergoña. Como mui bien decía nel actu institucional que mencionaba Vanesa Gutiérrez, la conseyera que ta llevando l’asturianu a los contestos que creen en propiedá (y lo que-yos manca…), “Ye emocionante ver cómo dalgo aparentemente tan íntimo como reconocer y estudiar la to llingua materna puede ser el motor qu’esplica una vida, dando al rellatu vital coherencia.”.
Trenta años depués, ¿qué ye lo que nos queda de too esto?. Hai un par d’años, yá como maestra definitiva na mio vieya escuela, dediqué una selmana de xunetu a poner n’orde l’aula d’asturianu, descubriendo dalgunes ayalguines que comparto nesti artículu en forma de semeya, y que falen del valor d’esos docentes primeros, qu’abrieron estaya. La motivación de la “llimpieza” yera la mengua inevitable y progresiva de la matriculación na asignatura, por cuenta d’unes cuantes males decisiones, otro poco de falta de profesionalidá y un muncho d’inadecuada visión sobre’l cambiu de contestu que se fai dende un poder políticu (¡y alministrativu!) poco enfotáu, na mio opinión, en facer otra cosa que dexalo morrer too por inanición. Asumía yo polo tanto, como parche transitoriu, la tutoría correspondiente, más l’asignatura d’asturianu. Una carga horaria difícil de mantener nel tiempu pero que fue quien a llevantar un poco, lo suficiente, l’alumnáu de Llingua Asturiana pal cursu presente.
Diz el refrán asturianu que cuando nun hai panchón toos riñen y toos tienen razón
Diz el refrán asturianu que cuando nun hai panchón toos riñen y toos tienen razón. El nuestru panchón ta, como un elefante nel cuartu, sentáu na alfombra dende hai bien d’años. Cada día más gordu, obscenamente rosa, pintando cola trompa una llinia menguante na paré. Y esa llinia nun fala de datos oxetivos de matriculación, sinón de falantes (esa estadística que naide nun quier facer), porque’l perfil del alumnáu na mio escuela nun ye ayenu a los cambios nel mediu rural asturianu, nin a la demografía, nin a los nuevos consumos audiovisuales. L’asignatura sigue siendo, sí, un elementu d’empoderamientu pa dellos alumnos, pero si primero yeren venti de venticinco, agora son cinco de venti, siendo positivos y confiando nos milagros, que constato qu’esisten y tienen nome y apellíos.
L’asturianu ye, polo tanto, dalgo ayeno pa cada día más families y la presentación de l’asignatura tampoco ayuda a que resulte atractiva. La competencia en Primaria col área, evaluable, de Cultura Asturiana, ye un despropósitu conceptual que guapamente pudo eliminase cola aprobación de la última reforma de la reforma de la Llei Educativa (LOMLOE), volviendo al modelu de “debida atención educativa” que tuvo aplicándose durante bien d’años. Rapacinos atendíos, sí, pero p’alquirir conocimientos del contestu onde desarrolles la vida, ehí ta la casilla onde poner la “x”.
La situación, ¿cómo definila?, ¿sórdida?, de los docentes, ye otra de les víes d’agua evidentes. Esa acumulación de llistes d’interinos ensin revisar, de saltos del profesoráu d’un centru a otru ensin posibilidá de contruir una propuesta en nengún, el ningunéu de la especialidá, yá clásicu. Cuando tienes unes persones con una formación yá equiparable al restu d’especialidaes, nun s’entiende de nenguna de les maneres que nun tengan opción a presentase a un concursu-oposición. Y da igual si les places finales son cinco o cincuenta, ye imprescindible pal funcionariáu da-y la opción a medir el so méritu y capacidá, estabilizando nos centros al que destaca pol so bon facer y dándo-y prestixu llaboral y pedagóxicu a l’asignatura. Que sí, van de la mano.
Asina que puede que tenga razón Adrián Barbón cuando diz que yá nun hai una ridiculización nos centros educativos por falar asturianu, y nun la hai porque l’asignatura sí valió pa desandar estigmas (que non prexuicios). Pero esa ye una victoria escasa si cada vuelta queden menos neñes y neños susceptibles de vivir esa situación. Menos docentes que reconozan les variedaes de pumar que plantó nel patiu “el d’asturianu” hai trenta años. Menos de too y mui poco, mui mui poco creo yo, que celebrar.
Otru día, ye una pequeña amenaza, dalguien tendría qu’escribir sobre la simbólica presencia del asturianu en Secundaria y la guerra abierta de los docentes d’esta etapa. Sobre l’anuncia de la implantación del asturianu na Educación Infantil, que nesti momentu ta desatendida o tapada con parches (pa que nun desapaeza nel mio centru asumo yo esti cursu les clases de 3 y 4 años – per otru llau, qué maraviya – por falta d’horariu de la maestra axudicada). Cuarenta años garraos con pinces y la voluntá de munches manes. Presupuestos y prexuicios que condicionen la vocación billingüe d’una escuela y una sociedá yá un poco fartuca de que la ninguneen.
