El mundu rural, los procesos d’identidá y la tradición oral de la nuesa tierra tán llamaos a protagonizar mientres tres díes, del martes 4 al xueves 7 de febreru vinientes, el Congresu Mundial de la Cultura Asturiana, que va cellebrase nel Edificiu Históricu de la Universidá d’Uviéu. Más de sesenta ponentes y centenares d’asistentes yá inscritos van participar nel que yá parez un fitu fundamental nel estudiu antropolóxicu d’Asturies y dende Asturies. Roberto González-Quevedo, presidente del Comité Organizador del Congresu, fala con NORTES al rodiu d’esta iniciativa, pa la que s’ufierten yá les caberes inscripciones.
Roberto, ¿cómo naz esta idega?
Hai un problema n’Asturies, que ye que, mientres n’otres comunidáes abriéronse darréu departamentos d’Antropoloxía, equí eso nuncanun llegó a cuayar. A pesar de ser un sitiu con muncha riqueza etnográfica, estraordinaria, nun hubo nunca equí un departamento d’Antropoloxía, nin nenguna facultá que promoviera eso; hebo intentos, sí, pero fracasaron tóos. Yo creo, anquen un vien al casu, que foi intencionáu políticamente. La cosa ye quotres instituciones tuvieron que sustituyir esi vacíu: asociaciones, museos; estudiosos… y l’Academia de la Llingua Asturiana, que vá años yá qu’entamó a editar la revista Cultures. Dempués de tóu esti tiempu, parecíanos que yera’l momentu de facer un gran congreso lo más universal posible, nel que, per un lláu, se pusieren al día investigaciones que se ficieren n’Asturies, y, per otru, xenerar un llugar d’alcuentru entre estudiosos. Asina ñació esti maratón de tres díes.
Ye una bona forma de definilo, ‘maratón’, porque tenéis aules paraleles, con programación a la par.
Sí. Había más de sesenta ponencies y tuvimos que facelo de forma paralela, en dos aules… Ye que, a pesar d’estos inconvenientes, queremos qu’a futuru la cosa vaya meyor, y entós aprovechamos tamién a trayer a antropólogos de relevancia mundial que mos falaren y orientaren sobre distintos aspectos metodolóxicos y teóricos de l’antropoloxía, de la situación actual de la investigación…
Y dende un puntu de vista multidisciplinar.
Eso ye. Una parte importante del congreso son conferencies estrictamente etnográfiques; vienen antropólogos, etnógrafos y estudiosos que nos van falar de lo que tan faciendo agora, a actualizar los estudios… pero otres munches charres van tener que ver cola cultura asturiana, inclusives la gastronomía. Vamos ver estudios que toquen otros aspectos como l’arte, la historia, la llingua, una visión más xeneral. Centrarémonos na cultura asturiana, pero nun sen multidisciplinar.
“mientres n’otres comunidáes abriéronse darréu departamentos d’Antropoloxía, equí eso nuncanun llegó a cuayar”
Vais facelo mui divulgativu tamién.
Esti nun ye’l típicu congresu al que namás van súper especialistes. Esto ta abiertu a asturianos en xeneral, a los interesáos na cultura asturiana y n’Asturies. Puede haber dalguna conferencia más técnica, pero la gran mayoría son mui accesibles pal públicu.
Pa los asturianos y asturianes que tean interesaos, pero tamién hai especialistes internacionales. ¿Qué ye lo qu’alcuentren dende fuera equí, n’Asturies?
Asturies siempres foi un territorio interesante. Hebo antropólogos mui importantes que se fixaron en nós. Lo que pasa ye que munchos d’ellos, desgraciadamente, yá morrieron, o tan enfermos… Por exemplu, James V. Fernández foi un gran antropólogu, mui importante nos Estaos Xuníos, que fizo munchos trabayos sobre Asturies. Él nun pudo venir, pero ye’l presidente del Comité Científicu. Como queríemos qu’esto nun fora solo una actualización, sinon tamién dalgo colo que construyir futuru, vamos trayer a grandes antropólogos de nivel mundial. Pa que nos informen y mos enseñen cómo se trabaya en determinaos campos.
Por exemplu: el primer día vamos cuntar na inauguración con una conferencia bien interesante al rodiu de cuáles son les expectatives de l’antropoloxía, que ye una ciencia mui viva, va cambiando (Encruciyaes de l’antropoloxía, por Paz Moreno Feliu, de la UNED, el martes a les 18.15 hores).
Ye qu’anguaño tamos nun momento clave nel que los grandes clásicos yá pasaron y tenemos distintos caminos que seguir. Por casu: l’antropoloxía n’Asturies, y la etnografía, foi hasta agora fundamentalmente nel ámbito rural, pero creo que nel futuru tenemos que dedicar tamien estos estudios a la ciudá. Y sobre esta antropoloxía urbana vien una gran especialista de la Universidá de Buenos Aires, Mónica Lacarrieu (Antropología urbana/antropología de las ciudades: ¿Cuál es la ciudad de los antropólogos?, el xueves a les 18 hores). Tamién n’Asturies, en Cultures y en xeneral hai munchu interés poles investigaciones de xéneru, poles migraciones. N’esi sen vien invitada tamién una profesora, Martha Judith Sánchez, que va falanos de la so esperiencia en xéneru y movimientos de población, etnicidá y conciencia social (Las identidades indígenas en México en el siglo XXI: globalización y transnacionalismo, el miércoles a les 19 hores).
Como mos interesaba tamién venceyar los estudios d’un territorio como Asturies, con una gran personalidá cultural, con casos similares, pensamos en Provenza. Ye un territorio distintu, claro: Asturies pertenez al ámbitu atlánticu y Provenza ye mediterraneu, pero nun dexa de ser un país con una llingua llatina, con similitudes… El profesor que vien d’ellí (Laurent Fournier, La culture festive provençale, entre mythe et réalité, el vienres a les 12.30 hores) va falanos de les cellebraciones festives en Provenza, y al rodiu d’ello van salir aspectos rellativos a la identidá, a cómo los políticos usen la cultura popular y el folklore.
Otru asuntu importante: cómo conservar la cultura popular. Va venir Gwynera Isaac, que ye del Smithsonian Institute, a falanos del ámbito norteamericanu y el papel de los museos conservando la memoria de los pueblos antiguos (International Approaches to Convening Language and Culture via Museums and Archives, el vienres a les 17 hores). Dempués vien una profesora de Buenos Aires que va falanos de cómo anguaño tovía se cellebra n’ún de los centros asturianos de Buenos Aires la fiesta del Ramu de Cangas (Susana Markendorf, Las Fiestas de la Colectividad Asturiana en Buenos Aires. El caso de la Fiesta del Ramo en el centro Cangas del Narcea de Asturias en Buenos Aires, el miércoles a les 12.30 hores). Falamos de les celebraciones y ritos que s’usen al celebrar esa lligazón con Asturies.
Asturies, nun pasáu, con toa esa emigración, xeneró una mitoloxía en torno a ella, tamién cola revolución del 34, cola minería… Ye una idega mui llatente: esa Asturies minera, lluchadora, sí, pero dende equí, anguaño, tenemos la percepción de qu’eso ya pasó y que yá nun tenemos identidá. Pero, polo que me cuentes, dientro del campu internacional seguimos más que vivos. Y nun solo como oxetu d’estudiu, sinon tamién con estudiosos d’equí, que van tan presentes nel Congresu.
Claro. La emigración fuerte asturiana que fue a América foi impresionante. Agora menguó muncho, cambiaron les condiciones económiques, pero tovía sigue viva en dalgunos países como México, na memoria de los descendientes… Alcuérdome de la impresión que tuve cuando me invitó el Centru Asturianu en Buenos Aires a ver el cementerio asturianu. Ye increyible, porque ehí hai parte d’Asturies enterrada. Y agora yá va menos xente moza, pero queda tovía la memoria de miles d’asturianos. Nel ámbito del estudiu tamién ye Asturies una tierra diferencial. Hai, por exemplu, un valor mui importante de la cultura nuestra, que ye la tradición oral. Ye probablemente la más rica de tola península.
Hai estudios dende va munchu tiempo, va venir xente que mos va falar de la tradición oral asturiana y una profesora de la universidá de Cádiz (María Jesús Ruiz, Miradas sobre la tradición: el romancero de Asturias, el xueves a les 12.30 hores), que tien una aprosimación a estos temes de la tradición oral mui novedosos, mui interesantes y actualizaos.
Van tar tamién Xosé Ambás y Ramsés Ilesies, el paradigma de recuperadores de la tradición oral n’Asturies.
Comentábenme ellos un tema mui interesante, que ye: ¿qué facemos cola nuesa tradición oral? Ye una tradición enorme que tenemos mui bien estudiada. ¿Qué facemos con ella? ¿simplemente guardala? ¿Facela más viva? ¿Utilizala nel mundu plásticu, na educación? Esi ye un tema mui interesante y que va plantegase (Recoyida ya continuidá de la tradición asturiana: ámbitos d’estudiu del ATOAM ya aiciones de recuperación, el vienres a les 16 hores)
Si esto nos lo planteguen va veinte años, equí n’Asturies la rempuesta sedría clara: facer un museu, un centru d’interpretación. Yera esa dómina de ‘boom’ de lo museos na que munchos quedaron, a la fin, como cascotes, como fachades… pero agora plantegámonos otros usos, otres formes de caltener esi padremoñu.
Por eso el congreso puede ser un puntu d’inflesión interesante. Tenemos una gran tradición oral, una gran riqueza arquitectónica… va haber intervenciones sobre los hórreos, y una exposición nel primer pisu, comisariada por Astur Paredes (visita guiada, martes a les 19.15 hores), sobre construcciones tradicionales asturianes de tóu tipu, dende les brañes a zones distintes, otros espacios xeográficos. Pero tóo esi mundu que tenemos tanto material como espiritual ye enorme, y ún de los papeles tiénenlo los museos, que se ta avanzando munchu n’ellos, son más interactivos… Pero, amás de tóo eso, tenemos que ser quién a insertar esta tradición na vida. El ríu nunca nun vuelve patrás, pero podemos garrar elementos, actualizalos; que seyan útiles y válidos económicamente. Por exemplu, munchu del material que recibimos cinematográficu tanto pa neños como p’adultos a vegáes tá fechu por países del norte d’Europa y tan inspirándose en tradiciones previes d’ellos y tamos asimilándoles. Podemos falar de gnomos, por casu, ¡pero ye que nosotros tenemos trasgos, que son asemeyaos! D’esa manera, el congresu puede servir pa que la xente reflesione cómo conservarla, guardala en la memoria y estudiar la cultura asturiana. Siempres ye interesante’l conocimientu, cuando estudies una cultura deprendes sobre’l ser humanu. Pero amás d’eso puede utilizase esi saber pa treslladalu a la nuesa visión del mundu actual. Hai participantes nel congreso que van falar de los mazcaritos, por exemplu, de cómo la tradición del Antroxu tradicional, que foi mui fuerte n’Asturies, agora ta revitalizándose (Ánxel Nava, Mazcaraes d’iviernu n’Uviéu, el vienres a les diez y media). El congreso quier ser un aldabonazu pa que la investigación sobre la cultura asturiana medre, pero tamién tá l’interés y la capacidá de revitalización, sabiendo que tamos yá n’otres condiciones económiques. Hai que guardar, conservar, facer vives eses formes culturales, pero n’otros contextos.
Como se fae,por exemplu, colos Mazcaritos d’Uviéu, que reivindiquen esa tradición venceyada siempres a lo rural, pero pel centru d’Uviéu.
Sí, d’Ánxel Nava. Eso podríemos treslladalo tamién a la lliteratura infantil. La que lleemos suel ser de dominio anglosaxón o xermánicu, del norte d’Europa. Ye mui guapu, y yá hai dalgo d’eso, en que seyamos quién a qu’esa lliteratura garre de los raigaños culturales propios elementos simbólicos que, amás, dan variedá. Y non conformar una lliteratura universal dominada pol mundu anglosaxón, o les tradiciones como’l día de los Difuntos, Halloween… Porque ye qu’equí había enantes tamién calabaces. Hai que ser a danos cuenta de qu’hai una cultura propia, y que val pa usala. Repito: sabiendo los nuevos condicionamientos.
Tenemos una bayura de coses equí, n’Asturies; el congreso ye namái la punta de llanza de tolo qu’hai: hai un montón d’años que s’espubliza Cultures, hai investigadores internacionales ya independientes n’Asturies… y, por embargu, con tóos estos mimbres, nun tenemos posibilidá d’estudiar Antropoloxía Social nin etnografía n’Asturies. Agora que desembarquen n’Asturies les universidáes priváes, sabemos qu’elles nun van apostar por estos estudios. Nin manera. Pero nel Congresu participa la Universidá d’Uviéu.
Ye que la Universidá d’Uviéu cambió muncho. N’aquellos años críticos nun hebo nengún sofitu, val, pero anguaño yo creo qu’eso cambió. La collaboración col Congresu lo demuestra. Tamién cambió l’actitú del Gobiernu asturianu. Asina que yo espero qu’eso, col tiempu, vaya solucionándose. Hai tamién una asociación d’antropoloxía asturiana que tamien tá trabayando; los museos… esa plenitú d’estudios universitarios dalgún día va llograse, de xuru. La espina que mos queda clavada ye que gran parte de la cultura tradicional asturiana ta desapaeciendo yá y que vamos llegar tarde a munches coses. La época de la yerba n’Asturies tovía tol mundu s’alcuerda d’ella, pero claro, agora yá cambió munchu: yá nun va tola familia, tá tóo mui mecanizáu y toa aquella cultura qu’había… la universidá del futuru, la que tenga estudios antropolóxicos, eso ya nun lo va a ver. Queda’l resquemor de qu’hai coses que nun va perdurar. Pero que nun se pueda facer eso nun quier dicir que nun se pueda facer otra cosa. Hai munches posibilidáes d’estudiu: falábemos enantes de l’antropoloxía urbana; l’antropoloxía económica, que yá s’estudió. Va haber intervenciones d’economistes y antropólogos. Sobre los condicionamientos socioeconómicos qu’hai nel mundu rural va haber varies conferencies.
Una d’elles yera la que diba dar David Rivas…
Sí, y decidimos nun quitala, facer nel so llugar un homenáx a David (Alcordanza, el miércoles a les diez y media). Va haber una intervención d’otru compañeru d’él, economista y especialista n’economía rural como ye Xosé Alba, y tamién va intervenir una alumna d’él en Madrid, que manda un vídeo onde fae un percorrú pola historia académica de David, un personáx mui importante y mui desconocíu n’Asturies. Él siempre tuvo por cómo utilizar la cultura asturiana pal resurdir económicu del país. Siempres tuvo por defender qu’eso qu’hubo fae años de despreciar tolo tradicional y lo rural non, ehí hai valores que pueden tener incluso valir económicu.
Ye verdá qu’él, siendo como yera una eminencia nel ámbito madrilanu, onde punxo clase, por embargo equí n’Asturies… pudimos esfrutalo los años caberos de les sos intervenciones en radio, prensa, pero ye una figura más desconocida de lo que merecía.
Sí. Él tenía una gran ampitú d’actividá. Yera una bona persona, lo primeru. Y yá dempués, dedicóse a munches coses; estudió munches coses de la cultura asturiana como la fiesta, la sidra… Pero aparte d’eso, yá de mui nuevu entamó yá a poner clases como profesor universitariu na Autónoma de Madrid. Ye una persona con un perfil académicu importante, influyente, y eso, equí, se conoz menos. David se manifestaba munchu n’Asturies pero él nun diba a la cuestión académica, sinon falando de temes asturianos, la identidá asturiana, la cultura… pero lo que yera la su actividá como profesor titular, claro, eso pertenecía a otra estaya de la su vida, y non.
“David Rivas siempre tuvo por cómo utilizar la cultura asturiana pal resurdir económicu del país”
Nos años 80 vivimos un ‘boom’ nun sé si de los estudios etnográficos y antropolóxicos, pero sí d’espublizaciones nesi sen, que dempués decayó. Anguaño, ¿cómo ves tú el panorama?
Empieza a vese dalgo, pero non demasiáu. El fundamentu del estudiu sedría la base d’un departamento d’Antropoloxía, pero lo d’antes: nun lo tenemos. Sí hai que destacar, y el Congresu va valir pa eso tamién, qu’hai xente mui valoratible, que trabaya muncho y qu’estos años nun dexó de facer llibros o artículos sobre la cultura asturiana. Gracies a esi esfuerzu personal tenemos obres mui valioses. Y a munchos d’estos espertos vamos tenelos nel Congresu.
Mientres tóos estos años, esos etnógrafos, antropólogos, que nun dexaron de trabayar y de manifestar, d’espublizar tóo lo que facíen, tuvieron un gran méritu. Anguaño, si vas a una llibrería hai poco de cultura asturiana, dende lluéu muncho menos de lo que querríemos, pero sí hebo xente que supo esgrexar, trabayar, espublizar…
Col su esfuerzu personal, con xeitu propiu.
Y perdiendo dinero. Pero dempués d’esi ‘boom’ de va años, agora damos un pasu alantre y col congresu vamos a falar l’antropoloxía, de la llingua, como componentes fundamentales de la cultura propiamente dicha. Y amás d’ello tamién queríemos, a dalgunos antropólogos asturianos que tan tamién en condiciones d’aislamientu, dá-yos un pocu d’ánimu y que s’animen a estudiar Asturies dende un puntu de vista propiu, non siguiendo solamente modelos de fuera. Con eso queremos tamien demostrar qu’Asturies ye capaz d’estudiase a sí mesma, ensin necesidá de depender d’otres entidáes académiques esteriores.
Falamos d’esta triba d’investigadores que tanto fizo pol país trabayando a destayu y el nome que me vien a la tiesta, el primeru, ye Berto Álvarez Peña. Que tamién va tar nel congresu, nun podía faltar (Antiguos vezos al rodiu del entierru n’Asturies, el miércoles a les doce).
Berto ye una persona que trabayó muncho ensin sofitos, y d’él tenemos les sus obres, artículos n’Asturies, la revista de Belenos; en Cultures. Equí va falanos d’un tema mui interesante, relativu a los enterramientos. Y eso ye una satisfacción mui grande. Ver a esa xente ehí, sentilos, falar con ellos…
Va poder facese la selmana que vien, nel Edificiu Históricu. Y amás, toes eses primeres espades van tar xunto a xente bien mozo que ta faciendo tamién coses mui interesantes, como Juan Allonca (Argul: poblo ben d’interés cultural y terra de meirazos, el xueves a les 10 hores) o Gonzalo Llamedo (Aplicar la glotopolítica al enseñu de la sociollingüística asturiana: el casu de la UABRA, xueves a les 16 hores).
Dientro del comité científicu busqué xente nueva tamién, pa dá-yos ánimu. Hai munchos que tan fuera, que nun pueden desarrollar el su trabayu equí, y esta ye una manera de sofitalu. Estes coses-yos animen, dánse cuenta de que hai dalgo, de que merez la pena. Conozco munchos que tan desanimáos, pero si miramos lo bueni, hai una serie de xente n’Asturies que pudo estudiar antropoloxía pola UNED y ta faciendo una gran llabor. Claro que nun ye lo mesmu que si hubiere un departamentu asentáu na Facultad, pero los estudios a distancia fizo que s’averaren a l’antropoloxía. Y yo quise que tuvieren tóos presentes, nun solo los antiguos proyectos qu’había, sinon tamién les nueves perspectives.
