Entama la cuenta atrás pa qu’aporte’l III Semando Fest, el festival de música moza n’asturianu qu’axunta grupos d’estilos estremaos pa reflexar la diversidá sonora d’esta escena. El 8 de febreru a les 21h van actuar en Lata de Zinc Abéu, Ferla Megía, Alienda y Melandru coles sos propuestes de música tradicional, urbana, folk y rock.
El Semando Fest va más allá de ser un simple conciertu y por eso tien toa una filosofía caracterizada por puxar pol relevu xeneracional na música asturiana; por ufrir un festival con un formatu orixinal qu’entemeza aspectos d’una gala colos d’un conciertu; que reivindica les sales de conciertos como un espaciu afayadizu pal exposigue de la música de raigañu; qu’apuesta por da-y oportunidaes a les y los creadores xóvenes y que trabaya por avanzar hacia la igualdá dientro de la música.
Musicasturiana.com y Ixuxú Cultura entamen esti eventu que nesta tercer edición va axuntar a Abéu cola so música tradicional axeitada pal baille; Ferla Megía, col so amiestu de pop, folk, triphip, dembow o rap; Alienda, banda de power folk que sigui’l camín de los meyores nomes del folk asturianu; y Melandru, formación de post-rock influyía pol shoegaze, dream pop y el folk. Les entraes anticipaes yá tán a la venta en musicasturiana.com a 12 € (10 € pa persones menores de 26 años).
Equipu xoven
Amás de les y los componentes de los grupos, l’equipu del Semando Fest ta formáu por xente mozo: el diseñu y la identidá visual ye obra de la diseñadora Paula Suárez Surimi (Xixón, 1990); Nay Semeya (Llanes, 1999) va facer les semeyes y el videu del festival; Raúl Alonso (Xixón, 1999) y Yedra Riesgo (Pravia, 1997) d’Héroes Ensin Nome van volver a presentar la gala y desendolcar llabores de producción, esto último xunto a Claudia González (Lluanco, 1999).
Xicu Ariza (Xixón, 1989), responsable d’Ixuxú Cultura y Musicasturiana.com, ye’l coordinador de tol proyectu per última vez, yá que al pasar nel 2025 de los 35 años d’edá va dexar la dirección del Semando Fest pa dar relevu nesta xera y asina caltener la coherencia cola filosofía del eventu.
Distintes entidaes públiques y privaes vuelven a patrocinar esti eventu p’ayudar a la so viabilidá económica. Son la Fundación Caja Rural de Asturias, el Conseyu de la Mocedá del Principáu d’Asturies y el Conseyu de la Mocedá d’Uviéu.
