El Grupu d’Inmatriculaciones d’Asturies denuncia que l’arzopispáu d’Uviéu rexistró como propia nel 2010 la ilesia de Santa Cristina de L.lena, del sieglu XI, Patrimoniu de la Humanidá, y que nun tien cultu nin recibe fondos eclesiásticos.
L’arte asturianu, lleváu alantre ente finales del sieglu VIII y principios del X, supón un de los más singulares exemplos del prerrománicu européu. Durante el reinu de Asturies, y antes de la llegada a la península del estilu románicu, llevóse alantre nel hoi Principáu, una actividá artística y arquitectónica que dexó’n patrimoniu altomedieval ricu, ensin comparanza n’Europa, onde l’arte prerrománicu ye más escasu, y amás desfiguróse na mayoría de los casos pol pasu de los sieglos y la yustaposición d’estilos nuevos a les edificaciones prerromániques. Esta singularidá del prerrománicu asturianu valió-y en 1985 la so declaración por parte de la UNESCO como Patrimoniu de la Humanidá. Los monumentos del prerrománicu asturianu incluín tanto edificaciones civiles, como relixoses, la mayoría. Una d’eses construcciones relixoses ye la ilesia de Santa Cristina de L.lena, del sieglu IX. Anque se trata d’un monumentu Patrimoniu de la Humanidá, ensin cultu relixosu, y que nun recibe fondos de la Ilesia pal so mantenimientu, Santa Cristina foi rexistrada en 2010 por 30 euros pol arzobispáu d’Uviéu. Asina acaba denuncialo’l grupu d’ inmatriculaciones d’Asturies, dedicáu a la investigación y denuncia d’esta práctica, que dexó a la Ilesia engordar d’una manera rápida y barata’l so su patrimoniu.
Inmatriculaciones: un choyu pa la Ilesia católica llegalizao por Aznar
En 1944 l’Estáu franquista reformó la llei hipotecaria pa permitir que la Ilesia católica rexistrara bienes inmuebles ensin escritura, alegando únicamente un escritu del arzobispu. Quier dicise, la Ilesia “auto-autorízase” pa dicir que tal o cual propiedá ye d’ella. La reforma hipotecaria del Gobiernu d’Aznar, en 1998, revalidó esta práctica vieya permitida pola llexislación franquista pa compensar a la Ilesia poles lleis llaicistes del periodu republicanu.
En 1944 l’Estáu franquista reformó la llei hipotecaria pa permitir que la Ilesia católica rexistrara bienes inmuebles ensin escritura, alegando únicamente un escritu del arzobispu.
Ensin necesidá d’escritures, les inmatriculaciones convirtiéronse nun auténticu coladeru pa que la Ilesia se fartucara a base de rexistrar ilesies, cementerios, cases parroquiales, finques rústiques, pisos, places de garaxe y too lo que se puso a tiru, mientres naide lo reclamase y decidiese pleitear colos abogaos eclesiásticos. Delles d’estes propiedaes incorporaas ensin filtru nengún al patrimoniu de la Ilesia española foron revendíes depués nun contestu alcista que favorecía’l dineru rápido. Yeren los años del boom inmobiliariu español, y la Ilesia quería la so parte del pastel. Pal PP amás yera una forma de pactar cola conferencia episcopal: Aznar nun derogaba la llei del albuertu del PSOE, histórica reivindicación del catolicismo español dende los años 80, pero a cambiu privilexaba económicamente a la Ilesia.
Dende 1998 la Ilesia católica inmatriculó por una cantidá mínima, 30 euros, miles de bienes inmuebles, ente ellos al menos 30 catedrales que yeren del Estáu dende los tiempos de la Segunda República. Según el Grupu d’Inmatriculaciones d’Asturies ún d’estos bienes inmuebles ye la Ilesia de Santa Cristina de L.lena. El grupo presentó como prueba una nota rexistral, y denuncia que les autoridaes eclesiástiques pudieren apropiase de la propiedá d’unos monumentos prerrománicos asturianos nos que nunca contribuyeron a conservar. L’arzobispáu nun niega la información que presentó’l grupu denunciante, pero alega que rexistrala foi namás qu’ una formalidá yá que la Ilesia foi dende’l sieglu IX la propietaria d’esi inmueble.
