TESTU: PABLO X. SUÁREZ/ IMAXE: IVÁN G: FERNÁNDEZ
Qué más dará’l mundu si lo que de verdá fai molar ye tener un cachorru tigre. Ye tener un tigrín y querer los demás follate o trabayar gratis o precario pa ti, asina pol papu, porque tener un tigrín ye poseer la guapura felina y tamién dominar esa parte de la natura selvaxe y imprevisible que podría y seguramente debería matate, pero nun se tasca y pela contra date mimos.
Asina la natura ye buena y nuestra, los mitos hippies y los mitos fachas conflúin nel mesmu mitu y nunca l’ibuprofeno superará a la cicuta: esta última ye creación de Dios y aparte tengo un tigre. Él cómeme de la mano y equí, nel mio mundu, nesti prau, que yá taba verde y acolchadino cuando llegué, naide tuvo que rozar nin pastiar nin segar primero.
Tengo un tigre y un bufón y un pactu col lumpenproletariat. Doi llimosna y tolerancia en compensación, conduzo per Cabárceno nun Audi A3. Voi acullá de la selva y de la dictadura progre porque tengo un tigre y con él poseo la vida mesma, tan falsa ella y tan pura y tan mía.
Namás contemplo l’espectáculu que pagué: ye igual qu’un cuadru de nanos de Velazquez, ye la propia hestoria reformulándose pal mio entretenimientu, currándoselo pa llegar esactamente al mesmu puntu, al sieglu d’oru, a la revolución neolítica y al futuru.
Acuto un poco de la carne que nun comeré y de la sangre que nun voi beber p’alimentar a la bestia, d’acordies con vezos pervieyos, y a cambiu ella fai gracies y dame dello d’eso que llamen amor.
