La presidenta de la Xunta Pola Defensa de la Llingua Asturiana, María Xosé Martínez, alvirtió esti vienres al presidente del Gobiernu asturianu, el socialista Adrián Barbón, que va ser xulgáu por ser quien dignificó la llingua o quien la dexó morrer. Pidió nesti sen al PSOE qu’entame la reforma del Estatutu pa materializar esta demanda, por ser l’únicu partíu que tien represtación abondo na Xunta, y por ser el partíu de Gobiernu.
Fízolo mientres la concentración que los partidarios de la oficialidá celebraron n’Uviéu, ante l’edificiu de la Xunta Xeneral, coincidiendo con un atípicu Día de Les Lletres. Atípicu pola fecha, dao que la so época normal ye últimos de mayu o primeros de xunu, quedando nesti añu aplazáu por mor de la pandemia de la Covid. Pero típicu no que se refier al tiempu: como ye avezao’l Día Les Lletres, llovía.
Magar del fríu y el contestu pandémicu, un bon piñu d’asturianistes acudieron a la llamada de la Xunta. Nel so discursu, Martínez dirixóse a Barbón: “esperemos que nun abandone lo que tamién usté sabe que ye de xusticia”.
La organización convocante recordó que “llevamos yá cuasi añu y mediu de llexislatura ensin que veamos nenguna acción p’abrir la reforma del estatutu. ¿A qué tamos esperando? Yá ta bien de sides”.
Nesti sen, pidió al Partíu Socialista, que garre la iniciativa porque ye l’únicu partíu con representación parllamentaria abondo pa entamar esa reforma y porque amás ye’l partíu del Gobiernu.
La responsable de la Xunta Pola refirióse a la situación de crisis sanitaria: “sabemos qu’hai un virus que ta faciéndonos la vida muncho más abegosa, pero nun nos tenemos qu’engañar, el virus nun ye’l culpable de que nun tengamos oficialidá nel añu 2020”. “Tampoco nun ye culpa de les aritmétiques parllamentaries”, añadió. “Que falta un votu pa los 27, dicen. Nun lo sabemos: nun sabemos si falta ún, si falten dos, si sobren o si en realidá falten toos. Hasta que nun s’abra la reforma del estatutu, lo que realmente falta ye voluntá”, afirmó Martínez.
Esa falta d’oficialidá ye la que, según la organización, da pie a la “función” que se ta representando na Xunta Xeneral, na que “una minoría d’estrema derecha ye quien a coartar el derechu de los diputaos y diputaes a falar n’asturianu y en gallego-asturianu. ¿Pue aguantase esto? ¿Nun ye la hora de dicir que yá tuvo bien?”
Na so intervención, también calificó de “vergonzoso” el fechu de que la Radiotelevisión autonómica “diera’l llombu” al idioma asturianu mientres los meses del confinamientu.
Concentración de la XDLLA en la Selmana de les Lletres Asturianes, Uviéu 02/10/2020 FOTO: Iván G. Fernández 
Concentración de la XDLLA en la Selmana de les Lletres Asturianes, Uviéu 02/10/2020 FOTO: Iván G. Fernández 
Concentración de la XDLLA en la Selmana de les Lletres Asturianes, Uviéu 02/10/2020 FOTO: Iván G. Fernández 
Concentración de la XDLLA en la Selmana de les Lletres Asturianes, Uviéu 02/10/2020 FOTO: Iván G. Fernández 
Concentración de la XDLLA en la Selmana de les Lletres Asturianes, Uviéu 02/10/2020 FOTO: Iván G. Fernández
