La soledá de la Primera República

La soledá de la I República foi tan clamorosa nel momentu de la so vida como nel presente, cuando nun hai corriente política nenguna que la reivindique espresamente.

Recomendados

Faustino Zapico
Faustino Zapico
Faustino Zapico. Historiador y profesor. Sindicalista a tiempu parcial y republicanu asturianista a tiempu completu.

En setiembre de 2018 cumplíase’l 150 aniversariu de La Gloriosa, la insurrección cívico-militar que-y punxo acabu a la monarquía de Sabel II y marcó l’aniciu d’un ciclu políticu de seis años onde España foi la democracia más avanzada del continente européu. Abulta estraño que tanto nel ámbitu académicu como nel políticu los aniversarios d’esti sexeniu (el de les primeres elecciones por sufraxu universal, el de la Constitución de 1869, el del aniciu de la monarquía amadeísta…) tean pasando na indiferencia más completa.

Nel ámbitu académicu, anque ésti nun tenga que tar condicionáu pa nada polos aniversarios “reondos”, tampoco sobraben los estudios sobre esti períodu, anque nun ye d’estrañar porque’l sieglu XIX paez escaecíu dafechu pa bona parte de la historiografía española. Nel políticu, resulta tovía más llamadero dao que’l procesu revolucionariu de 1868 foi el de los ensayos democráticos más radicales de la Historia decimonónica non solo española sinon tamién continental. ¿Nun ye reivindicable pa la nuestra casta política, a esquierda y derecha, qu’en 1868 se punxera n’España’l votu universal masculín cuando nun había nesi momentu nengún otru estáu n’Europa (sacante Suiza) onde tala cosa existiera? ¿Nun ye reivindicable que la constitución de 1869, nacida de les elecciones de xineru d’esi añu, fuera la más avanzada del continente nesi momentu? ¿Nun ye llamadero qu’en febreru de 1873 se proclamara la república, única nel continente sacante la suiza y la sanmarinense, cuando en Francia, valtáu yá’l réxime bonapartista, diben tardar años en facelo? Ta claro que non, dau’l pocu interés en facelo. La derecha española sigue pensando, o faciendo querenos pensar, que la Historia entama en 1977. La esquierda, por desgracia, qu’en 1931. Anantes d’eso, Prehistoria.

Pero’l casu ye que, Prehistoria o non, pasaron coses, y coses enforma importantes pa entender el desenvolvimientu históricu posterior. La constitución de 1869 restauraba la monarquia, y el parlamentu optó por da-y la corona a Amadeo de Saboya, fíu menor del rei Vítor Manuel d’Italia. Nel so breve reináu (xineru de 1871-febreru de 1873) tuvo qu’encarar una guerra colonial heredada en Cuba (dende 1868) y otra civil nueva colos carlistes (dende 1872). Col so principal valedor, Juan Prim, asesináu díis anantes d’entamar a reinar, y con una base d’apoyu mínima, agravada poles engarradielles ente los sos partidarios, Amadeo fartucó pronto, y abdicaba un 11 de febreru de 1873 depués de negase a violentar la Constitución. Abandonaba’l poder voluntariamente un rei democráticamente electu al que’l gobiernu republicanu acabaría ufriéndo-y la nacionalidá y la residencia, como forma de reconoce-y un comportamientu tan estremáu de los monarques borbónicos.

Quedamos entós en qu’un 11 de febreru de 1873 unes Cortes bicamerales en sesión conxunta enfrentábense al abismu. Cuatro años anantes echaren a la reina. Tuvieren casi dos años pa topar un rei, y ésti colaba a los dos años de reinar. Nun podín ponese a buscar otru, nun podín ufri-y a Sabel II que volviera, y optaron pola única solución posible: la República.

Llegaba entós el nuevu réxime non como resultáu d’una insurrección victoriosa o d’un movimientu popular imparable, anque la base social nun fuera pequena, sinon por eliminación d’opciones, porque nun había otra cosa. Y proclamábala un parlamentu de mayoría monárquica, ensin nenguna gana de pone-y les coses fáciles, y con dos guerres en cursu, en Cuba y na península, nun contestu internacional desfavorable, con una Europa apoderada por monarquíes constitucionales cuando non absolutes.

El nuevu réxime llegaba non como resultáu d’una insurrección victoriosa, sinon por eliminación d’opciones

Si’l contestu yera malu, xusto ye reconocer que la dirixencia republicana tampoco tuvo al altor de la situación. Suel dicise con razón abonda que los republicanos cuando tenín el gobiernu nun tenín programa y que cuando yá tenín programa yá nun tenín el gobiernu. D’ehí que’l gobiernu provisional republicanu tuviera cuatro presidentes n’once meses. El Partíu Demócrata Republicanu Federal nun tenía la coherencia interna abonda pa xestionar una situación tan revesosa, empezando pela propia definición del nuevu réxime, la de federal, proclamada’l 1 de xunu, depués d’unes elecciones constituyentes en marzu baxo’l boicot de monárquicos de toles tendencies.

Los republicanos, masivamente mayoritarios na nueva cámara pero non tanto nuna sociedá tan plural, taben dividíos en tres ales: una intransixente que quería una federación d’abaxo p’arriba, dende’l conceyu al estáu federal, y que presionaba dende la esquierda baxo concepciones filoanarquistes nel so momentu fondamente criticaes por Friedrich Engels, delegáu de l’AIT pa España. Una centrista, representada por Pi y Margall que compartía bona parte de los principios de los intransixentes pero qu’intentaba ellaborar primero una constitución y articular un gobiernu fuerte pa encarar el conflictu carlista. Y una benévola, de calter más conservador y d’un federalismu muncho más apocáu.

Los árboles nun dexaron ver la viesca. Estanislao Figueras, superáu pola situación, y depués d’un conatu de güelpe militar de los intransixentes, soltó nun conseyu de ministros la so famosa frase: “Senyors, ja no aguanto més. Vaig a ser-los franc: estic fins als collons de tots nosaltres!”. Dexó a escondidielles la so dimisión nel despachu, garró un tren na estación d’Atocha y nun se posó hasta llegar a París.

Entró depués Pi y Margall, la cabeza meyor amueblada de la república y posiblemente del sieglu, “l’únicu socialista d’ente los dirixentes republicanos”, sigún Engels, que dimitiría al mes de xurar el cargu al topase cola sublevación intransixente en forma de cantones independientes que, en cuenta de federase, optaron por engarriase ente ellos.

La república xiraba a la derecha pa sobrevivir. Nicolás Salmerón optaba pola represión de los cantonalistes, ensin ser a controlar el frente carlista. Opuestu de tola vida a la pena de muerte, dimitiría por nun roblar la d’ocho soldaos desertores al bandu carlista. Entraba entós Castelar, el republicanu unitariu que redactaría un proyectu de constitución federal pa la república que nunca llegaría a entrar en vigor. Pidió-y a les Cortes plenos poderes y diéron-ylos, pero’l 3 de xineru de 1873 perdía l’apoyu de la cámara. Mientres se procedía a elexir un nuevu presidente, los militares daben un güelpe d’estáu, disolvín el parlamentu, prohibín la prensa republicana, dexaben a los sos dirixentes baxo arrestu domiciliariu y ponín de presidente al xeneral Francisco Serrano, exrexente, que dirixiría una pantasmal república ensin republicanos que nun llegaría a los dolce meses, hasta qu’un nuevu pronunciamientu militar trexera de vuelta a los Borbones a la xefatura del estáu na persona d’Alfonso de Borbón, primoxénitu de Sabel II. Completábase la revolución nel sentíu completu del términu: un xiru de 360º. De los Borbones a los Borbones, depués de pasar per toles opciones.

El fracasu del la república de 1873 foi convenientemente publicitáu polos propagandistes del réxime posterior, el de la Restauración borbónica, como antídotu escontra intentos posteriores y como forma de xustificación d’aquella monarquía que tanto se paez a l’actual. Hasta fueron quien a meter nel DRAE la voz república como sinónimu de caos y desgobiernu. Pero si ye normal que los sectores conservadores intentaren echar un carráu de cuchu sobre la memoria de la I República, yelo menos que la esquierda, ablucada cola Segunda, seya quien a ver les virtudes de la que la precedió.

El fracasu del la república de 1873 foi convenientemente publicitáu polos propagandistes del réxime posterior

Con tolos sos fracasos, culpa en bona parte de los errores republicanos pero tamién del contestu xeneral en que se dio’l procesu, nun ta de más sulliñar delles cuestiones que la primera esperiencia republicana foi a plantegar anque nun llegara a da-yos una solución durable, como ye l’abolición de la esclavitú na isla de Puerto Rico (en Cuba quedaría pospuesta a causa de la guerra en cursu), la idea de que’l nuevu réxime namás podía ser vidable si ganaba l’apoyu de les clases populares, dándo-y asina conteníu rial al ideal republicanu de llibertá, igualdá y fraternidá, y una solución alternativa a la construcción y articulación territorial del estáu-nación español, plantegando un modelu federal auténticu mui estremáu del actual modelu unitariu descentralizáu qu’intenten vendenos como federal. Nun ta de más pensar cómo pudo articulase y desendolcase una España basada na llibre federación de 17 estaos simétricos, y los cambios que pudo suponer respecto al marcu actual, fonte d’agravios y eternamente inacabáu.

La soledá de la I República foi tan clamorosa nel momentu de la so vida como nel presente, cuando nun hai corriente política nenguna que la reivindique espresamente acullá de la mera declaración conmemorativa. Y tando próximos al so 150 aniversariu, igual nin eso. Igual la esquierda tendría que vese nel espeyu de Xanu Bifronte, con una cara vuelta al pasáu y otra al futuru, sabiendo d’ónde vien pa ver ónde quier dir.

- Publicidad -spot_img

Actualidad

Dejar respuesta

Please enter your comment!
Please enter your name here