Servicios Sociales nun tenía constancia de la situación del desahuciáu en Xixón

L'actual suspensión hasta'l 9 de mayu namás s'aplica si hai informe de vulnerabilidá, y l'afectáu nun lu solicitara.

Recomendados

David Artime
David Artime
Periodista y escritor. En 2009, ganó el premio de narrativa en lengua asturiana de la editorial Trabe con la novela "La Bufanda", en la que aborda el mundo de los ultras de fútbol.

Too paez indicar que’l vecín de Xixón que resultó firíu de bala nun enfrentamientu cola Policía Llocal cuando intentaba evitar el so desahuciu armáu con un hacha nun acudió a los servicios sociales del Conceyu pa informar de la so situación. Fontes municipales confirmaron a Nortes que nun había constancia del casu na Alministración llocal.

El socesu provocara cierta confusión, dada la prohibición de desahucios oficialmente vixente hasta’l próximu 9 de mayu. Según la norma actual, la persona que recibe la notificación del abandonu de la so vivienda puede solicitar l’aplazamientu de la mesma. El Xulgáu encarga entós un informe de vulnerabilidá a los servicios sociales. En función del mentáu informe’l Xulgáu decide o non l’aplazamientu hasta’l 9 de mayu. Esta posibilidá vien informada nel documentu que recibe la persona cola orde d’execución. Nesti casu, paez ser que l’afectáu padecía problemes psiquiátricos.

Videu del incidente grabáu por un vecín.

Teóricamente’l vecín que protagonizó l’incidente cola Policía Llocal podría contar con una alternativa habitacional de vivienda social, en casu de demostrase la vulnerabilidá. Sicasí, la Plataforma d’Afectaes poles Hipoteques (PAH) caltuvo yá delles polémiques cola Dirección Xeneral de Vivienda, a la qu’acusó de nun dar alternativa a los desahuciaos por impagu d’alquiler, como’l d’esti home. Fontes averaes a esta organización aseguren que nestos casos namás s’ofrez solución cuando se trata de “vulnerabilidá estrema”, como puea ser por exemplu, una persona discapacitada.

PROBLEMES A PARTIR DEL 9 DE MAYU

Les mesmes fontes alvirtieron sicasí qu’a partir del 9 de mayu, la situación n’Asturies puede tornar complicada si nun se produz otra prórroga de la prohibición, dao que los xulgaos namás tán aplazando desahuicios hasta dempués d’esta fecha. Y trataríase, en tou casu, de los desahucios de persones con situación de vulnerabilidá reconocida. El restu sigue practicándose normalmente, como dexó claro l’incidente d’esti xueves.

En casu de nun renovar la suspensión de desahucios a xente vulnerable volveríase a la situación anterior a les midíes urxentes aprobaes nel Conseyu de Ministros. Esto sería un aplazamientu de mes y mediu nel casu de particulares, y de trés meses nel casu de vivienda social d’alquiler.

Ello ye que’l portal de subastes del BOE sigue informando de bienes embargaos. N’Asturies anúnciense esti vienres un total de 29 subastes, la mayoría viviendes na zona central de la comunidá autónoma. Según los datos de Conseyu Xeneral del Poder Xudicial, en 2019 practicáronse 1.000 ordes de llanzamientu.

Actualidad

Dejar respuesta

Please enter your comment!
Please enter your name here