Asociaciones y colectivos del Conceyu de Siero pidieron al Gobiernu municipal qu’entame a retomar “un ciertu nivel de programación cultural”, habida cuenta de los problemes que ta causan la supresión de cualquier actividá, “tanto clases como actividaes presenciales”.
Asociaciones, empreses, entidaes y persones vinculaes a la cultura en Siero tuviemos una reunión virtual p’analizar la situación de la cultura nel conceyu nestos tiempos de pandemia. Les conclusiones que se sacaron recoyéronse nun manifiestu. Nél plantégase que la supresión de cualquier actividá “supón una midida que fier de manera mortal un sector ampliu y crucial pa Siero dende munchos puntos de vista”.
Los firmantes recuerden nuna nota de prensa que “la cultura trai beneficios económicos, d’imaxe, de proyección, sociales y hasta mentales y anímicos; los colectivos y persones firmantes opinen que nun se pue prescindir d’esta rica vida cultural”. Maticen que nun dexen d’asumir “que la situación de pandemia obliga, de toes toes, a guardar protocolos estrictos qu’eviten la tresmisión vírica”, pero tamién s’argumenta que, “cumpliendo eses normes, les actividaes culturales que se puen entamar sedríen segures dafechu, como se vien demostrando n’otros sitios, incluyíos conceyos vecinos”.
“Poro, pidimos al gobiernu del Conceyu que se plantegue retomar ciertu nivel de programación, de subvenciones y de cobertura de les actividaes que pueda entamar el texíu asociativu de Siero, mui ampliu y activu. Too ello en coordinación y cola participación de les entidaes comprometíes col setor cultural”, concliuye la nota de prensa.
