La música n’asturianu sumó 4,7 millones de reproducciones nel 2019 en Youtube y streaming

Recomendados

David Artime
David Artime
Periodista y escritor. En 2009, ganó el premio de narrativa en lengua asturiana de la editorial Trabe con la novela "La Bufanda", en la que aborda el mundo de los ultras de fútbol.

La música n’asturianu o d’espresión asturiana sumó en 2019 más de 4,7 millones de reproducciones, tanto al traviés de la canal Youtube, como de les diferentes plataformes de streaming (Spotify, Deezer o Apple Music, ente otres). Son datos sacaos del informe sobre consumu dixital de música asturiana, que’l periodista Xicu Ariza vien de publicar nel Anuariu de la Música Asturiana del añu 2020, acabante de presentar la discográfica Goxe.

Del total, el 50,6% d’estes reproducciones ficiéronse al traviés de Youtube, y el 49,3 al traviés les mentaes plataformes de Streaming. Estes últimes vendieron un total de 214 cantares y 172 discos. Sicasí, les ventes de la música asturiana siguen siendo mui superiores en formatu físicu que en formatu dixital. Ello ye que nel 2019, el 58% de la facturación n’Asturies foi en formatu físicu, y namás un 42% al traviés de les plataformes.

Pa igualar la venta d’un cD faen falta 15.000 reproducciones de youtube

Ún de los aspectos que destaca l’informe son les dificultaes p’algamar qu’estes reproducciones en plataformes o youtube s’averen a la rentabilidá de la venta d’un discu físicu. “Si cola venta de un CD físicu suelen facturase 12 euros, p’algamar esi mesmu importe en formatu dixital hai que tener aproximadamente 3.500 reproducciones nuna plataforma de soscripción de pagu como Spotify Premium y 15.000 nuna plataforma gratuita como YouTube”, explica’l documentu.

Conciertu de D’Urria emitíu na canal Amosando, al traviés de Youtube.

Hai qu’entender, señala sin embargu l’informe d’Ariza, “que’l consumu dixital de música ye imparable y que va siguir medrando, polo que toca aprovechar les ventayes que xenera“. “Dalgunes d’elles son mui amañoses pa enfrentase a dellos retos que tien la nuestra escena como son los d’aumentar audiencia ente les xeneraciones más moces, algamar mayor repercusión internacional, xenerar más fontes d’ingresos y llegar a nuevos públicos a los qu’anguaño nun se ta aportando namás cola venta física nin cola música en vivo”, añade.

No referente a la mayor repercusión internacional, el trabayu también aporta datos que dicen qu’EEUU (35.000 reproducciones), Méxicu (34.000) y Reinu Uníu (28.500) son los países que más consumen música n’asturianu per internet, dempués d’España. Na llista figuren tamién países como Arxentina, Canadá, Francia, Suiza o Colombia, ente los que más música asturiana sintieron. Un datu que rescampla ye que Xapón, con 13.300 reproducciones, figura ente los primeros, penriba d’otros como Francia. Dientro d’España, dempués d’Asturies les comunidaes que más música n’asturianu consumen son Madrid, con 360.000 reproducciones, y Cataluña, con 126.000.

Actualidad

Dejar respuesta

Please enter your comment!
Please enter your name here