L’exdirixente socialista de Xixón y exconceyal del PSOE nesti ayuntamientu José Manuel Sariego ye unu de los 15 trabayadores de la empresa pública EBHISA, responsable de la descarga de graneles sólidos d’El Musel, acoyíos al ERE d’estinción d’empléu materializáu’l mes pasáu. Dase la circunstancia de que’l ya extrabayador, qu’entró nel 2013 fuera de conveniu sin pasar les pruebes selectives, taba a puntu de xubilase (cumplió 67 años el 30 de xineru, día de la so despidida na terminal). Agora cobrará una indemnización de más de 20.000 euros.
La estaya de la Corriente Sindical d’Izquierdes na EBHI pidió esti llunes públicamente a la Intervención Xeneral del Estáu (IGAE) qu’investigue l’aplicación d’esti ERE, y n’especial el casu del antiguu cargu públicu municipal. El delegáu de la organización, Fernando González, pide que s’esclare si Sariego contó con información privilexada sobre la futura aplicación del Espediente de Regulación D’Empléu, motivu pol que retrasaría la so xubilación pa poder percibir la indemnización.
González recuerda qu’Intervención yá planteara dudes sobre la contratación de Sariego nel añu 2013, meses dempués d’abandonar la política municipal. Accedió a la empresa estibadora con contratu relevu’l 23 de xineru d’esi añu, fuera de conveniu, y con un salariu añal de 47600 euros. El puestu creóse “ad hoc”, según el representante sindical: responsable de relaciones colos sindicatos y de cursos de formación . “Nun hubo procedimientu de selección polo que desconocemos los requisitos exixíos pa desempeñar la tarea de formación de personal, y poro nun podemos analizar si la persona contratada los cumple”, apunta l’IGAE nuna auditoría d’EBHISA nos exercicios del 2011 al 2013.
Intervención yá plantéo dudes sobre la contratación del conceyal nel 2013
“Agora fírmen-y una indemnización de 160 díes, cuando ta a puntu de xubilase. Paeznos qu’equí tán pagándose favores políticos”, afirma González.
CSI quier que s’investigue, non solo’l casu de Sariego, sinón del ERE, porque “supón pagar un millón d’euros n’indemnizaciones a 15 persones que van xubilase a los pocos meses“. “Ye una empresa pública y polo tanto ye malversación de fondos públicos. Podríamos tar ante un casu de prevaricación”, señala’l delegáu sindical. Recuerda amás que la propia Intervención yá llamó l’atención na citada auditoría a la empresa por un casu paecíu de dos trabayadores que nel 2012 percibieron indemnizaciones xusto antes de xubilase.
NUEVU “DESPIDU”
Per otra parte, esti martes 24 la CSI convocó paros na EBHI entre les 12.00 y les 16.00 hores en protesta por un nuevu “despidu” de los siete previstos, al nun cubrise la tasa de reposición. Trátase de los trabayadores eventuales a los que nun se-yos renovará’l contratu, pese a establelu’l conveniu de la empresa.
Esti asunsu foi’l que motivó la fuelga de fame que cuatro empleaos (el propiu González ente ellos) llevaron a cabo mientres 37 díes l’añu pasáu, conflictu que tovía sigue sin solución.
González critica que la estratexa de la empresa ye reducir plantiya y empeorar les condiciones llaborales. El d’esti martes será’l segundu contratu non renováu de los siete previstos. Los otros cinco estinguiránse d’equí a xunu. Colos 15 trabayadores acoyíos al ERE d’estinción, serán 22 empleaos menos, nuna plantiya que contaba con 135 asalariaos antes d’entamar estos axustes.
“Tán negociando agora suprimir el turnu de nueche, y xustifíquenlo en que nun tienen personal abondo, y sin embargu tán reduciendo plantiya. Ye una política d’empresa dirixida a otres prioridades que tien l’Autoridá Portuaria na descarga, en favor de les terminales onde tán les empreses privaes”, afirma’l repressentante sindical.
