A la Federación Socialista Asturiana la inclusión del llobu nel Llistáu d’Especies d’Especial Protección (Lespre) ta costándo-y más d’un dolor de cabeza ante’l so potencial electoráu. L’últimu tuvo llugar en Llanes, onde una moción presentada pol PSOE llocal a favor de mantener el Plan de Xestión autonómicu (que permitía el control poblacional del cánidu), salió refugada pol Gobiernu municipal. ¿El motivu? Nun s’olvida que los 15 diputaos socialistes del Cordal Cantábricu (Galicia, Asturies, Cantabria y Euskadi) votaren a favor de la medida del Ministeriu pa la Transición Ecolóxica. “Agora prentenden quedar como lluchadores en favor de la causa ganadera. Pues va a ser que non”.
Les razones del voto en contra de trés de los cuatro partíos que conformen el Gobiernu municipal (Vecinos Por Llanes, Foru y PP, mientres qu’IU astúvose) espúnxoles el conceyal llaniscu d’Agroganadería, Xuan Valladares, presidente de l’Asociación de Ganaderos Trashumantes d’Asturies (AGTA) y d’Asturies Ganadera. Firme detractor de la inclusión del llobu nel Lespre, publicó un comunicáu nel que calificó de “brindis al sol” la moción socialista.
Colos votos de los parlamentarios del norte la protección del llobu nun diba salir aprobada
Lo cierto ye que la xugada socialista preséntase revesosa. El Plan de Xestión que defiende’l PSOE n’Asturies prevé controles poblacionales del llobu, lo que va contra la midida del Ministeriu, que prohíbe dafechu la eliminación d’exemplares al incluyir la especie nel Lespre. Poro, aprobala ye una forma simbólica de votar en contra del nuevu Lespre, dalgo que, como recuerda Valladares “nun tien nengún efectu prácticu”. Lo que sí tuviera efectu, matiza’l conceyal, ye que los quince diputaos socialistes cantábricos “votaren nel Congresu contra la inclusión del llobu nel Lespre”. “Si lo lleguen a facer, nun s’aprobara”, reprocha.
El Gobiernu socialista asturianu yá se posicionara en contra de la midida de la ministra Tejerina. El conseyeru de Mediu Rural, Alejandro Calvo, criticóla duramente y el director xeneral de Ganadería, Nino Rodríguez, amenazó con dimitir si nun se modifica esta prohibición de matar llobos. Sicasí, como recuerda Valladares, los sos compañeros socialistes asturianos nel Congresu dieron el so apoyu a un testu que, a la vista ta, nun alcuentra muy bona acoyida nes bases autonómiques del so partíu.
