El Sindicatu Unitariu Autónomu de Trabayadores de la Enseñanza d’Asturies (SUATEA) y el Sindicatu Nacional de Trabayadores Temporales de l’Alministración (SINTTA) convoquen al profesoráu interín d’Asturies a una fuelga’l miércoles, día 14, pa esixir “l’aplazamientu de los procesos selectivos d’educación convocaos pa los cuerpos de profesoráu d’Enseñanza Secundaria, profesoráu técnico de Formación Profesional y profesoráu d’escueles oficiales d’idiomes nel mes de xunu” y pa reclamar “la negociación d’un nuevu Acuerdu d’Interinidá que garantice una mayor estabilidá”.
Les dos organizaciones recuerden qu’esti cursu “presentóse con munches dificultaes dende’l principiu, con sobrecarga de trabayu del profesoráu por mor principalmente de la semipresencialidá y la readaptación del llabor docente a unes condiciones nueves”. La prioridá pal personal docente, señalen, “ta siendo realizar el so llabor cola máxima profesionalidá pa rematar el cursu ensin que l’alumnáu véase perxudicáu nun escenariu tan complicáu”. Too ello, añaden, col “estrés y l’ansiedá que supón el mieu a los contaxos. Nel casu del profesoráu interín esta ansiedá increméntase delantre de l’amenaza de convocatoria d’unos procesos selectivos nos que xueguénse les sos espectatives y, na comunidá asturiana, los sos puestos de trabayu”.
Afirmen qu’amás hai esmolecimientu porque’l procesu de vacunación del personal docente podría traer “series complicaciones pa les persones aspirantes y pa miembros de los tribunales” y dende’l puntu de vista organizativu va haber “caos nos centros, porque’l calendariu llectivu llega esti añu hasta’l 30 de xunu, con tolo que conlleva d’esámenes, xeres alministratives y burocrátiques, y un porcentaxe eleváu de profesoráu qu’ha de cumplir estes funciones nos centros educativos va tar nes oposiciones como aspirante o como tribunal”.
Asinamesmo, a SINTTA y a SUATEA paez-yos “imprescindible la negociación d’un nuevu Acuerdu de Profesoráu Interín que-y dea estabilidá al colectivu”. L’acuerdu vixente n’Asturies, “firmáu por ANPE y UGT en 2014, supón una discriminación pal profesoráu interín asturiano respecto al d’otres comunidaes de la nuesa redolada”. A resultes de les últimes sentencies xudiciales, consideren que l’acuerdu que ta vixente anguaño “axústase cada vez menos a los fundamentos del derechu español y comunitariu”. Piden un nuevu acuerdu “que nun suponga’l despidu del profesoráu interín nel presente y nel futuru”.
