Andecha Astur pide que se condone la delda pol pagu simultaneu de Salariu Social y Ingresu Mínimu

Señalen que “la Conseyería de Drechos Sociales y Bientar vien dando amueses de la so incompetencia"

Recomendados

Redacción Nortes
Redacción Norteshttps://www.nortes.me
Te contamos lo ocurrido centradas en la periferia.

Andecha Astur pide nun comunicáu que se condone la delda a les persones afectaes pol pagu simultaneu del Salariu Social Básicu (SSB) y del Ingresu Mínimu Vital (IMV). El partíu soberanista considera “inaceutable que seyan los beneficiarios del IMV los que tengan de facer frente a les consecuencies de la ineptitú y mala xestión del Gobiernu de Barbón, que nun supo tramitar correchamente los espedientes nin apurrir la información en tiempu y forma. Poro, desiximos al ‘Principado’ qu’asuma la responsabilidá d’estes deldes, procediendo darréu a la so total condonación”.

Señalen n’Andecha Astur que dende la puesta en marcha del IMV “la Conseyería de Drechos Sociales y Bientar vien dando amueses de la so incompetencia, cola que castiga a aquelles estayes de la población que se supón que tien de protexer: los más esfavorecíos. El caos alministrativu y la desinformación qu’acompangó’l treslláu d’espedientes del SSB al IMV finó con más de 9.000 asturianes y asturianos repitiendo xestiones y viviendo na incertidume de ver nel aire los sos futuros ingresos”. Añaden que l’Alministración asturiana “nun foi quién a dar de baxa del cobru del SSB a aquellos beneficiarios qu’entamaron a cobrar l’IMV, ensin que siquiera se-yos informare de la incompatibilidá d’ambos ingresos, polo que 14.000 persones percibieron los dos salarios al mesmu tiempu durante un periodu d’ente ocho y once meses, siendo ello que munchos siguen nesa situación”.

Andecha Astur recuerda que “los pagos indebíos tienen de ser agora devueltos por unes economíes yá de por sí endexes, que verán dividíos a la metá los sos ingresos y al mesmu tiempu tendrán de facer frente a pagos de fasta 6.000 euros”. Entruga que “si l’estrañu modelu de ‘socialismu’ que carecemos en Madrid y n’Asturies pue invertir 126 millones d’euros pa participar nel conseyu d’alministración de Duro Felguera, si se pue ‘perdonar’ a la banca más de 60.000 millones d’euros pol so rescate, si se puen marafundiar 25 millones d’euros nuna Casa Real… ¿por qué nun se pue condonar a los más esfavorecíos una delda de la que nin siquier son responsables?”.

Amás, la formación nacionalista esixe “conocer el destín d’eses devoluciones del SSB, un dineru que correspondía, según los presupuestos de 2020, a atender les necesidaes de los más esfavorecíos al traviés de los Servicios Sociales y que nun pue tener otra finalidá que nun seya ésa. Nun queremos qu’eses perres acaben formando parte d’un misteriosu fondu B”. Andecha Astur quier que “se condone la delda, pero si’l Gobiernu de Barbón escueye una posición puramente capitalista y d’esplotación de los más débiles, desixiremos que la delda cobrá torne íntegramente a asuntos sociales; concretamente, que vaiga a complementar la escasísima aida que representa l’Ingresu Mínimu Vital y a paliar la perda de la Aida por Fíu a Cargu cola que se castiga a les families perceutores del mesmu”.

Actualidad

Dejar respuesta

Please enter your comment!
Please enter your name here