Dientro de les actividades complementaries de la IX Muestra de Cine Social y Derechos Humanos d’Asturies (MUSOC 2021), esti sábadu, día 17, va tener llugar el coloquiu online que lleva por títulu Antifascismo. El otro documental, nel que van participar Helena Castellà, Miquel Ramos y Pedro Vallín. L’alderique va tener llugar ente les once de la mañana y la una de la tarde, moderáu por Diego Díaz, historiador, activista social y redactor de Nortes.
Qué hai detrás de los discursos del odiu y cómo hai que combatilos, cómo tan influyendo nes nueses mentalidaes y comportamientos, cómo se manifiesta anguaño’l fascismu y qué significa ser antifascista son dalgunes de les entrugues que se van plantiar nesti actu, organizáu en collaboración con Acción en Red, el Atenéu Obreru de Xixón, El Café de Macondo y Radio Kras. El coloquiu va poder siguise a traviés del canal en YouTube d’Acción en Red, n’El Café de Macondo (na plaza de La Habana, en Xixón) y a traviés de Radio Kras (105 FM).
Helena Castellà, especialista en xéneru, migraciones, derechos humanos y estrema derecha, ye asesora de polítiques sociales y derechos humanos nel Parlamentu Européu, integrante del Institutu de Derechos Humanos de Cataluña y autora del informe La extrema derecha, un fenómeno europeo (Fundación Josep Irla, 2017). Miquel Ramos, periodista especializáu n’estrema derecha y movimientos sociales, collabora en medios de comunicación como La Marea, El Salto, Público, TVE, TV3, A Punt o ETB, y ye coautor de dellos libros colectivos y de los proyectos crimenesdeodio.info y sesnetopics.org, amás de coordinador del informe De los neocons a los neonazis: la derecha radical en el Estado español (Fundación Rosa Luxemburgo, 2021). Pedro Vallín, redactor parlamentariu nel diariu La Vanguardia, fue ún de los fundadores en 2013 de l’Asociación d’Informadores Cinematográficos d’España (AICE), que creó los Premios Feroz.
