Los alcuentros poéticos POEX21 de Xixón entren na recta final

Azahara Alonso, Julio Rodríguez y Juan Carlos Mestre van ser los protagonistes güei

Recomendados

Redacción Nortes
Redacción Norteshttps://www.nortes.me
Te contamos lo ocurrido centradas en la periferia.

Los alcuentros poéticos POEX21, que se desarrollen en Xixón a lo llargo de toa esta selmana, entren na recta final con cuatro xornaes nes que van participar autores como Julio Rodríguez, Manuel Vilas, Laura Casielles, Xuan Bello o Begoña M. Rueda. Esta cita, organizada pola Fundación Municipal de Cultura y dirixida pol poeta y traductor Jaime Priede, ta celebrándose con actos presenciales na antigua Escuela de Comerciu, el Muséu Nicanor Piñole y el Centru de Cultura Antiguu Institutu.

Güei, xueves, a les siete de la tarde, van participar l’autora y l’autor uvieínos Azahara Alonso y Julio Rodríguez, colos sos llibros Gestar un tópico y Una extraña ciencia, respectivamente, nun actu presentáu pol poeta y narrador de Tinéu Miguel Rojo. A les ocho y media de la tarde va tar presente’l lleonés Juan Carlos Mestre col so llibru La hora izquierda, presentáu pola filóloga y profesora universitaria Natalia Cueto Vallverdú. Dambos alcuentros van tener como escenariu’l Muséu Nicanor Piñole.

El vienres l’actividá treslládase al patiu del Antiguu Institutu. A les seis de la tarde Natalia Cueto Vallverdú va presentar a la poeta y videocreadora gallega Miriam Reyes, una de les autores de (h)amor2. Una hora más tarde’l filólogu Leopoldo Sánchez Torres va conducir l’alcuentru col poeta uvieín Fernando Beltrán, autor de La curación del mundo, y la poeta pucelana María Ángeles Pérez López, autora de l’antoloxía Verbos para el bosque. La xornada va pesllase a les ocho y media de la tarde con Auténtico. Antología poética & retrospectiva gráfica de Luis Eduardo Aute, edición del poeta y periodista xixonés Miguel Munárriz, cola presentación a cargu del filólogu uviéin Vicente Duque.

El sábadu continúa’l programa nel Antiguu Institutu, a les doce y media del mediudía, con Los últimos del XX, edición de Miguel Munárriz, y llectures a cargu d’autores que formen parte d’esa antoloxía: Rodrigo Olay, Candela de las Heras, Miguel Floriano, Pablo Núñez, Dalia Alonso, Lorenzo Roal, Rocío Acebal, Carlos Iglesias y Xaime Martínez. A les seis y media de la tarde va tar presente l’aragonés Manuel Vilas cola so obra Roma, presentáu por Miguel Rojo. A les ocho de la tarde va ser el turnu de l’andaluza Begoña M. Rueda, ganadora del Premiu Hiperión de Poesía 2021 por Servicio de lavandería, a la que va presentar la escritora y periodista vasca Verónica García Peña.

El domingu, a les doce del mediudía, el poeta y narrador Pablo Antón Marín Estrada va conducir nel salón de la Escuela de Comerciu l’alcuentru ente dos poetes gallegues: Yolanda Castaño, autora de Un cobertizo lleno de significados sospechosos, y Alba Cid, autora d’Atlas. A la una y media de la tarde, nel mesmu llugar, van tar la poeta y periodista sierense Laura Casielles, con Las señales que hacemos en los mapas, y el poeta y narrador de Tinéu Xuan Bello, con Poesía reunida, presentaos pola profesora y escritora xixonesa Marta Mori.

P’asistir como públicu hai que facer la inscripción telemática (hasta la viéspora de cada actu). Tamién ye posible siguir los alcuentros a traviés del canal en YouTube de la Rede de Biblioteques de Xixón.

- Publicidad -spot_img

Actualidad

Dejar respuesta

Please enter your comment!
Please enter your name here