Echó a andar la Selmana de les Lletres Asturianes, dedicada esti añu a la figura del poeta, dramaturgu, novelista y performer mierense Nel Amaro (1946-2011). La inauguración, nel Auditoriu Teodoro Cuesta de Mieres, corrió a cargu del alcalde, Aníbal Vázquez; la conseyera de Cultura, Política Llingüística y Turismu, Berta Piñán, y el coordinador de los actos de la Selmana, Xandru Fernández. El profesor y escritor destacó d’Amaro la so voluntá de construir una obra con conteníu social y políticu y mui influenciada poles vanguardies europees, usando como materies primes la llingua y la cultura popular asturiana.
Pal coordinador de la Selmana y del llibru presentáu güei, Pruebes d’autor. Les siete vides de Nel Amaro, la obra d’Amaro, que nunca llegó a profesionalizase na lliteratura nin nel arte y que sobrevivió como bedel de la Casa de la Mocedá de Turón, tuvo nes antípodes d’otros proyectos hexemónicos de la cultura de la Transición n’Asturies, como la revista Los Cuadernos del Norte, dirixida pol periodista Juan Cueto y financiada pola antigua Caja de Ahorros de Asturias, “un proyectu versallescu fechu d’espaldes a esa cultura popular asturiana que Nel reivindicaba”, dixo. Berta Piñán emponderó a Nel Amaro como “l’axitador cultural que fue n’asturianu, l’escritor que fue y que nos dexó esi heriedu tan importante, esi exemplu tamién d’honestidá y de bon facer”, y añadió que “yera de xusticia que-y dedicáremos una Selmana de les Lletres Asturianes”.
Tres les intervenciones proyectóse’l documental dedicáu a Nel Amaro, con testimonios de la so vilda, Marta Baquero, l’historiador Rubén Vega y amigos y compañeros del autor homenaxáu, como Miguel Rojo, Adolfo Camilo Díaz o Ánxel Nava. Nel documental, Miguel Rojo destaca d’Amaro, qu’esti añu habría de cumplir 75 años, la so condición de “axitador cultural”.
Una de les dos esposiciones dedicaes a Nel Amaro nesta Selmana de les Lletres, que puede verse nel vestíbulu del Auditoriu de Mieres, repasa la so vida y obra, poniendo l’acentu na so xera d’activista políticu y cultural, a la escontra de corrientes de modes y d’una corrección política que nunca acató.
Los actos de la Selmana de les Lletres Asturianes siguen esti martes a les siete de la tarde, nel salón d’actos del Hotel d’Asociaciones de L.lena, cola presentación del llibru Esperté ensin patria pa dormir ensin pruyimientos de conciencia. Antoloxía lliteraria de Nel Amaro, con edición a cargu de Xandru Fernández. Darréu va haber una velada d’Arte n’Acción, cola participación de José Busto, Abel Loureda y Ánxel Nava.
