Musicasturiana.com amplía’l so proyectu con nueva web y más conteníos

La creación del Archivu de la Música Contemporánea Asturiana, de Goxe Producciones, ye una de les novedaes

Recomendados

Redacción Nortes
Redacción Norteshttps://www.nortes.me
Te contamos lo ocurrido centradas en la periferia.

Musicasturiana.com pon en marcha un proyectu pa convertise na mayor web de música asturiana, con conteníos informativos, guía de recursos, tienda online remocicada y la incorporación del Archivu de la Música Contemporánea Asturiana (AMCA), una iniciativa de Goxe Producciones que, ente otres coses, va dixitalizar y ufrir al públicu un conxuntu de materiales bayurosu. Pa desendolcar too esto entamen la campaña de micromecenazgu Esto nun ye un crowdfunding, equí pasamos el cepillu (con cuotes anuales de 15, 30 o 60 euros), cola que quien quiera sofitar el proyectu puede asociase y tener accesu a conteníos esclusivos, artículos de regalu y participaciones pa sorteos.

En payares de 2017 nacía musicasturiana.com, la primer tienda online y distribuidora dixital dedicada a la música d’espresión asturiana. Tres años depués, esta web yá vendió más de 1.800 cedés, algamó más de diez millones de reproducciones nes plataformes dixitales, fizo que se sintiera música asturiana en más de cien países y desendolcó actividaes como’l ciclu de presentaciones de discos Amosando. La iniciativa da agora un pasu más llanzando una nueva web cola qu’amplía’l proyectu. El pasáu vienres abrió la nueva tienda online, con más de 320 artículos a la venta. Nes próximes selmanes, musicasturiana.com va convertise nun mediu de comunicación dedicáu a la música del país, una guía de recursos de la escena musical asturiana y va dar agospiu al AMCA, que naz sobre la base de la colección privada del músicu y productor discográficu Xune Elipe.

L’AMCA, destaquen los sos promotores, “va ser una especie d’enciclopedia del sieglu XXI dedicada a la música asturiana, dando forma a un proyectu pioneru n’Asturies, con una ventana abierta a cualesquier requexu del mundu al traviés del click“. Too ello “dende una perspectiva empresarial profesional que puxa por reconocer el papel fundamental que tien la música con identidá propia dientro de la marca Asturies“. Pasu ente pasu “vamos dir dixitalizando y dando a conocer un conxuntu de materiales bayurosu (cartelería, grabaciones, programes de mano, maquetes, cartafueyos, revistes, audiovisuales, semeyes…) y perinteresante, con bien de conteníos inéditos y/o esclusivos”.

El primer material que va asoleyar l’AMCA ye’l conciertu entamáu nel Teatru Campoamor d’Uviéu’l 24 de payares del 2004 por cuenta del trenta aniversariu de Conceyu Bable, nel que s’axuntaron depués de tiempu abondo dellos de los más importantes protagonistes del Nuevu Canciu. Esta grabación, que nunca viere la lluz, fíxose directamente dende la mesa de soníu y foi dixitalizada y masterizada, polo que supón “un documentu únicu y perespecial”.

Actualidad

Dejar respuesta

Please enter your comment!
Please enter your name here