Una decena d’entidaes memorialistes y republicanes asturianes ficieron públicu un manifiestu conxuntu nel que señalen que la Llei de Memoria Democrática que va llevase al Congresu de los Diputaos ha de ser “un instrumentu normativu capaz d’ayudar a educar a les nuestres xeneraciones moces en valores cívicos democráticos y que llevante una muria de contención a los intentos involucionistes de los sectores más reaccionarios de la nuestra sociedá”. Piden una llei “que respuenda a los valores de verdá, xusticia y reparación, con garantíes de non repetición, qu’equipare en derechos a les víctimes del franquismu coles víctimes del terrorismu, porque nun hubo n’España organización terrorista más dañible que’l réxime de Franco“.
Los colectivos firmantes afirmen que “somos una parte pequeña del movimientu popular y democráticu, pero avala les nuestres posiciones el nuestru compromisu d’años llargos de trabayu p’acabar cola impunidá de los crímenes franquistes, que ye tamién una forma d’evitar que vuelvan producise crímenes asemeyaos”. Alerten de que nos últimos años “tamos viviendo un resurdir del pensamientu y de les acciones de la estrema derecha”, con actos y acciones de “negacionismu de los crímenes del franquismu, profanación de sitios de la memoria, exaltación de la dictadura, defensa del fusilamientu masivu d’opositores políticos y últimamente amenaces graves a dirixentes de partíos. Y lo que ye más grave, bien de veces con complicidaes más qu’evidentes de persones vinculaes a aparatos del Estáu y de dellos medios de comunicación, amás de representantes electos en parllamentos”.
Añaden que “pa quien conocemos bien lo que significó la nueche llarga del franquismu, nengún d’estos fechos ye un tema menor. Porque sabemos que n’otres dómines históriques empezóse asina, y banalizando eses acciones namás se llogró que depués s’enllenare España de fuexes comunes, de paredones de fusilamientu y de mil y milenta persones nel exiliu. Convién alcordase de la historia pa nun la repetir”. Poro’l movimientu memorialista asturianu llevanta “la palabra de la indignación, de la rabia contenida, dende la memoria democrática, el compromisu republicanu y la llucha antifascista, pa dicir ¡Nunca más!“.
Asinamesmo afirmen que “nun podemos dexar, y nun vamos dexar, más retrocesos en materia de llibertaes públiques, más recortes de derechos democráticos y más perda de bienestar social pa la mayoría social. Esiximos la derogación de la Llei Mordaza yá“. Reclamen “afondar na democracia, nes llibertaes reales, porque namás con más democracia y más llibertá, con más igualdá y más xusticia social, vamos poder construir nun mundu fraternu, que ye’l que precisamente odien quien agora intenten facenos creyer que na llucha del últimu contra’l penúltimu ta la nuestra salvación”.
Los colectivos y asociaciones firmantes son FAMYR (Federación Asturiana Memoria y República), La Comuna d’Asturies, Rede Ceaqua (Coordinadora Estatal d’Apoyu a la Querella Arxentina contra Crímenes del Franquismu), Atenéu Obreru de Xixón, Atenéu Republicanu d’Asturies, Asociación Republicana Cabu Peñes Cristino García, Estaya de la Memoria L’Altu Nalón, Plataforma contra los Recortes d’Avilés y Comarca, Foru Pozu Fortuna y Sociedá Cultural Xixonesa.
