El Comité de Solidaridá cola Causa Árabe (CSCA) y la Coordinadora Asturiana d’Organizaciones non Gubernamentales pal Desarrollu (CODOPA) convoquen pa esti vienres, día 14, a les ocho de la tarde, una concentración na xixonesa plaza del Institutu en solidaridá col pueblu palestín, que ta sufriendo nes últimes feches una nueva folada de bombardeos por parte d’Israel. Con esi actu, les entidaes convocantes quieren denunciar y esixir el fin de “la masacre en Gaza”, onde l’exércitu sionista asesinó nos últimos díes a decenes de civiles, ente ellos delles neñes y neños.
Nesi mesmu escenariu, la conocida como plaza del Parchís, tuvo llugar el pasáu 29 d’abril otra concentración de solidaridá cola causa palestina y con Juana Ruiz, trabayadora humanitaria en Cisxordania encarcelada ensin cargos pol Estáu d’Israel.
